वाळूज महानगर : लग्नासाठी हट्ट धरणाऱ्या विवाहित प्रेयसीवर तिच्या प्रियकराने चाकूने हल्ला केल्याची घटना गुरुवारी दुपारी जोगेश्वरीत घडली. या चाकूहल्ल्यात प्रेयसी किरकोळ जखमी झाली असून, हल्लेखोर प्रियकर फरार झाला आहे.
याविषयी अधिक माहिती अशी की, संगीता (२३, नाव बदलले आहे) हिचे लग्न झालेले असून, तिला दोन मुले आहेत. लग्नानंतर संगीताची साडेतीन वर्षांपूर्वी दशरथ निकम (२३, रा. जोगेश्वरी) याच्याशी मैत्री होऊन नंतर दोघांचे प्रेमसंबंध निर्माण झाले. प्रियकराच्या नादात संगीता पतीचे घर सोडून वाळूज परिसरात दशरथ याच्यासोबत राहत होती. दशरथ हा उद्योगनगरीतील एका बीअरच्या कंपनीत काम करतो. गुरुवारी दुपारी २.३० वाजेच्या सुमारास संगीता ही दशरथला भेटण्यासाठी जोगेश्वरीला गेली होती.
दशरथची भेट झाल्यानंतर संगीताने त्याच्याकडे लग्न करण्याचा तगादा लावला. यावेळी दशरथने संगीताला ‘तुला दोन मुले असल्याने मी तुझ्याशी लग्न करू शकत नाही’ असे सांगितले, तसेच आपण दुसरीकडे लग्न करणार असल्याचे त्याने सांगितले. प्रियकर लग्न करण्यास तयार नसल्यामुळे संगीताचा दशरथसोबत वाद झाला. या वादावादीनंतर संतप्त झालेल्या दशरथने संगीताला शिवीगाळ करून चाकू काढून तिच्या डाव्या हातावर व डोक्यावर वार केले.
संगीताला दशरथ मारहाण करीत असल्यामुळे शेजारील नागरिक, तसेच दशरथच्या आईने मध्यस्थी करून दशरथच्या तावडीतून संगीताची सुटका केली. चाकूहल्ला केल्यानंतर दशरथ हा घटनास्थळावरून पसार झाला. या चाकूहल्ल्यात किरकोळ जखमी झालेल्या संगीताने एमआयडीसी वाळूज पोलीस ठाणे गाठून प्रियकर दशरथ निकम याच्याविरुद्ध तक्रार दिली. याप्रकरणी पुढील तपास पोहेकॉ. कारभारी देवरे करीत आहेत.