छत्रपती संभाजीनगर : बांधकामाच्या साहित्य खरेदीतून झालेल्या वादात चार जणांनी एका तरुणास बेदम मारहाण केली. त्यात त्याचा मृत्यू झाल्याची घटना सोमवारी रात्री मुकुंदवाडीतील संजयनगरमध्ये घडली. या प्रकरणी चौघांच्या विरोधात मुकुंदवाडी पोलिस ठाण्यात खुनाचा गुन्हा नोंदविण्यात आला आहे.
गौतम भानुदास वाहूळ (रा. संजयनगर, मुकुंदवाडी) असे मृत्यू झालेल्या तरुणाचे नाव आहे. गौतमचे भाऊ संजय यांनी दिलेल्या फिर्यादीनुसार विलास करचुंडे, त्याची पत्नी वैशाली करचुंडे (रा. शिवशाही कॉलनी) यांच्यासह महादेव भालेराव व अश्विनी भालेराव यांचा आरोपींमध्ये समावेश आहे. गौतम मिस्त्रीकाम करून कुटुंबाचा उदरनिर्वाह चालवत होता. सोमवारी त्याचा आरोपींसोबत बांधकामाच्या साहित्य खरेदीवरून वाद झाला होता. वाद वाढू नये म्हणून गौतमच्या मोठ्या भावाने विलासला घरी बोलावून वाद मिटवून घेऊ, असे समजावून सांगितले होते.
मात्र, दुपारी तीन वाजता गौतम पुतण्या अमरसोबत शिवशाही कॉलनीत गेला होता. तेथे त्यांनी विलास यांना सेंट्रिंगच्या साहित्याची मागणी केली. मात्र, त्यांच्यात भांडण झाले. विलास, वैशाली, महादेव व अश्विनी यांनी गौतमला मारहाण केली. यानंतर गौतम झोपला, तो उठलाच नाही. त्याचे कुटुंबीय घाबरले. त्यांनी त्याला खासगी रुग्णालयात दाखल केले. मात्र, त्याला डॉक्टरांनी तपासून मृत घोषित केले.