छत्रपती संभाजीनगर : शहरातील हत्यांचे सत्र अद्याप सुरू असून सोमवारी पहाटे पुन्हा एक हत्या झाल्याची घटना निदर्शनास आली. हर्सूल कारागृहाचे अंमलदार सिद्धार्थ बन्सीलाल जाधव ( ४२, रा. जेल कर्मचारी निवासस्थान) यांची कारागृह परिसरातच लाकडी दांड्याने चेहरा व डोके ठेचून हत्या करण्यात आली. यात सचिन भगवान दाभाडे (३६, रा. चेतना नगर) हा तरुण गंभीर जखमी झाला आहे.
हर्सूल पोलिसांच्या माहितीनुसार, ४५ वर्षीय जाधव हे हर्सूल कारागृहात अंमलदार होते. पत्नी, मुलगी, मुलासह ते कारागृह कर्मचारी निवासस्थानात वास्तव्यास होते. सोमवारी पहाटे निवासस्थानाच्या आवारात पडक्या जागेत जाधव अत्यंत गंभीर अवस्थेत आढळल्याचा कॉल हर्सूल पोलिसांना प्राप्त झाला. पोलिसांनी घटनास्थळी धाव घेतली. तेव्हा डोक्याच्या मागील बाजू व तोंडावर गंभीर वार झाल्याचे आढळून आले. घटनास्थळी दारूच्या बाटल्या व दोघांचे बूट व मोठ्या प्रमाणात रक्त आढळून आले आहे.
प्राथमिक माहितीनुसार, जाधव व दाभाडे दोघे मित्र आहेत. रविवारी रात्री ते कारागृह परिसरात भेटले. त्यानंतर जाधव यांची हत्या झाली तर गंभीर जखमी दाभाडे यांनी जखमी अवस्थेतच मित्राच्या घरी धाव घेतली. मित्राच्या दरवाजावरच ते कोसळून बेशुद्ध झाले. मित्राने त्याला घाटीत दाखल केले असून अतिदक्षता विभागात उपचार सुरू आहे. जाधव यांची हत्या कोणी केली, हे अद्याप ही गूढ असून दाभाडे शुद्धीवर आल्यावर चित्र अधिक स्पष्ट होईल. दरम्यान, पोलिस तांत्रिक तपासाच्या आधारे देखील मारेकऱ्यांचा शोध घेत आहेत.