छत्रपती संभाजीनगर : रोज शिवीगाळ करून छळ करणाऱ्या आकाश राजू ऊफाड (२५, रा. पडेगाव) याने गुरुवारी रात्री मद्यधुंद अवस्थेत वडिलांना मारहाण केली. रोजच्या या त्रासाला कंटाळून संतप्त वडील राजू शेणफड उफाड (५२) याने मुलगा झोपताच फावड्याने डोके फोडून त्याची हत्या केली. यासंदर्भात घरमालकाने पोलिसांना कळविले. त्यानंतर ठाण्यात दहा तास नामानिराळे राहणाऱ्या बापाला पोलिसी खाक्या दाखवताच त्याने हत्येची कबुली दिली.
मजुरी काम करणारा राजू, पत्नी सविता, म़ृत मुलगा आकाश हे पडेगाव येथे राहात होते, तर मोठा मुलगा सागर हा पद्मपुऱ्यात राहतो. सागर लालबागच्या दर्शनासाठी मुंबईला आणि पत्नी लक्ष्मी सणासाठी पुण्याला मुलीकडे गेली होती. त्यामुळे आकाश व राजू हे दोघेच घरी होते. २१ सप्टेंबरला आकाश घरी गेल्यानंतर त्यांनी सोबत जेवण केले. मात्र, रोजच्याप्रमाणे पुन्हा त्याने वडिलांसाेबत वाद घातला. रोज पत्नी असल्याने वाद मिटत होता. पण, गुरुवारी वाद वाढतच गेला. आकाशने शिवीगाळ करत वडिलांना बेदम मारहाण केली व झोपी गेला. मुलाच्या या रोजच्या त्रासाला कंटाळलेल्या संतप्त वडिलाने गाढ झोपलेल्या मुलाचे डोके फावड्याने अक्षरक्ष: फोडून त्याची हत्या केली.
नामनिराळे राहण्याचा प्रयत्नघटनेनंतर राजूने ‘तो मी नव्हेच’ अशी भूमिका घेतली. मुलाची अज्ञाताने हत्या केल्याचे घरमालकाला सांगितले होते. छावणी पोलिस ठाण्याचे निरीक्षक कैलास देशमाने, सहायक निरीक्षक पांडुरंग भागिले, उपनिरीक्षक प्रमोद देवकते, गणेश केदार यांनी घटनास्थळी धाव घेतली. आकाशच्या डोक्याचा चेंदामेंदा झाला होता. शवविच्छेदन होईपर्यंत पोलिसांनी राजूची चौकशी केली नव्हती. झोपेतून पहाटे साडेतीन वाजता लघुशंकेसाठी उठल्यानंतर मुलगा थेट अर्धनग्न अवस्थेत रक्तबंबाळ अवस्थेत दिसल्याचे राजू सांगत होता. चार वाजता मात्र पोलिसांनी खाक्या दाखवताच त्याने सर्व कबुली दिली. रोज मला शिवीगाळ करायचा. गेल्या काही दिवसांत सतत गळा दाबून श्वास बंद करायचा. गुरुवारी पत्नी घरात नसल्याने संताप अनावर झाला आणि मुलाला मारून टाकल्याची कबुली त्याने दिली.