आमदार नीलेश राणेंवर गुन्हा दाखल, तरीही शिंदे अनभिज्ञ की सूचक मौन; म्हणाले, 'माहिती घेतो'

तिजोरी ही राज्यातील जनता जनार्दनाची आहे. आम्ही विश्वस्त आहोत- एकनाथ शिंदे

छत्रपती संभाजीनगर: शिंदेसेनेचे कोकणातील आमदार डाॅ. नीलेश राणे यांच्यावर काल गुन्हा दाखल झाला. हा गुन्हा दाखल होऊन दहा तासांहून अधिक कालावधी उलटला तरी उपमुख्यमंत्री एकनाथ शिंदे यांना याविषयी आज शनिवारी पत्रकारांनी विचारले असता त्यांनी माहिती घेतो,असे उत्तर देऊन अधिक बोलण्याचे टाळले.

नगर परिषद निवडणुकीच्या प्रचारसभांसाठी अमरावतीकडे रवाना होण्यासाठी शिंदे शुक्रवारी रात्री छत्रपती संभाजीनगरात मुक्कामी होते. शनिवारी सकाळी अवघ्या एक मिनिट सहा सेकंदात शिंदे यांनी पत्रकारांच्या तीन प्रश्नांची उत्तरे दिले आणि ते प्रचार दौऱ्याला रवाना झाले. नाशिक येथे झाडे तोडण्यासाठी प्रचंड विरोध होतो आहे तेथे अभिनेते सयाजी शिंदे आले आहे, याकडे लक्ष वेधले असता ते म्हणाले की, याविषयी माहिती घेतो, पर्यावरण पुरकच आम्ही प्रकल्प करीत असतो. पर्यावरणाचा समतोल राखणे ही शासनाची भूमिका आहे, हे अनेक प्रकल्पामधून आपण पाहिले आहे. याबाबत अधिक माहिती घेतो.

आमदार नीलेश राणे यांच्यावर गुन्हा दाखल झाला, याविषयी विचारले असता उपमुख्यमंत्री शिंदे यांनी याविषयी माहिती घेतो, असे उत्तर देत अधिक बोलण्याचे टाळले. उपमुख्यमंत्री अजीत पवार हे प्रचारादरम्यान निधी देणार नाही, असा इशारा मतदारांना देतात. राष्ट्रवादी काँग्रेसचे प्रदेश अध्यक्ष शशिकांत शिंदे यांनी पवार यांच्यावर टीका करताना निधी का त्यांच्या बापाचा आहे का, असा सवाल केला. याविषयी विचारले असता शिंदे म्हणाले की, खरे म्हणजे हा निधी, राज्याची तिजोरी ही राज्यातील जनता जनार्दनाची आहे. आम्ही विश्वस्त आहोत. यामुळे कोणीही तसा मतिथत्तार्थ काढू नये,असे आपले म्हणणे आहे.