अहमदपूरच्या यशवंत विद्यालयाच्या सृष्टीला ९९ टक्के गुण

राम तत्तापुरे , अहमदपूरयेथील यशवंत विद्यालयाच्या सृष्टी करकनाळे या विद्यार्थिनीने ‘लातूर पॅटर्न’चा ठसा राज्यात उमटवित ९९ टक्के गुण मिळविले आहेत. शाळेने केलेल्या दाव्यात ही बोर्डात पहिली तर राज्यात दुसरी असल्याचे सांगितले जाते. परंतु याला कसलाच अधिकृत दुजोरा मिळू शकला नाही. ९९ टक्के गुण मिळविणाऱ्या सृष्टीने आपण आईसारखे डॉक्टर होणार असल्याचा मानस व्यक्त केला. ती त्यांच्या आई-वडिलांना एकुलती एक आहे. लातूर पॅटर्नने एक काळ महाराष्ट्रात आपले वेगळेपण सिध्द केले. आता बोर्डाच्या निकालात लातूर बोर्ड तळाशी आहे. परंतु सृष्टी चंद्रकांत करकनाळे या मुलीने मात्र आपल्या जिल्ह्याचे नाव झळकाविले. तिने दहावीला संस्कृत, गणित, विज्ञान आणि इतिहास - भूगोल या चार विषयात शंभर पैकी शंभर गुण मिळविले. तर मराठीला ९३ आणि इंग्रजीला ९५ असे गुण मिळविले आहेत. तिची आई मिनाक्षी या सुध्दा यशवंत विद्यालयाचीच विद्यार्थिनी असून त्या दहावीला बोर्डाच्या गुणवत्ता यादीत आल्या होत्या. सृष्टीची आई मिनाक्षी अहमदपुरातच वैद्यकीय व्यवसाय करतात. तर वडील चंद्रकांत हे सिव्हील इंजिनिअर असून ते गुत्तेदार आहेत. घर सुखवस्तू असले तरी मुलांच्या शिक्षणाबाबत प्रचंड जागरुक आहे. सृष्टी आई-वडिलांना एकुलती एक...सृष्टीची आई मिनाक्षी आणि वडील चंद्रकांत हे जोडपे मुलीच्या यशाने हरखून गेले आहे. आपल्याला आपल्या मुलीचा अभिमान असल्याचे त्यांनी ठासून सांगितले. सृष्टी हे एकमेव अपत्य या दाम्पत्याला असून त्यानंतर त्यांनी दुसरे मूल होऊ दिले नाही, हे विशेष. मुलगाच वंशाचा दिवा म्हणणाऱ्यांना खणखणीत चपराक देणाऱ्या या दाम्पत्यानेच जणू आमची मुलगी आपला वंश किती उत्तमपणे चालवेल, हे समाजाला दाखवून दिले. सृष्टी म्हणते नो खासगी क्लास, ओन्ली क्रमिक पुस्तकेआपल्या यशाबाबत ‘लोकमत’शी बोलताना सृष्टी म्हणाली की मी दहावीच्या अभ्यासाचे कधीच दडपण घेतले नाही. दडपणच नव्हते त्यामुळे खासगी क्लासला कुठे गेले नाही. फक्त क्रमिक पुस्तकांचा अभ्यास करून हे यश मिळविले असल्याचे सांगितले. आपल्या अभ्यासात मात्र मी वर्षभर सातत्य राखले. दररोज चार तास मी नित्यनियमाने अभ्यास केला. त्यावरच मला हे यश मिळविता आले. आता मी डॉक्टर होऊन रुग्णांची सेवा करणार असल्याचेही तिने ‘लोकमत’ला सांगितले. सृष्टीने शाळेची शान वाढविली : मुख्याध्यापक शिरूरकर आमच्या शाळेच्या मुलीने ९९ टक्के गुण मिळवून आमच्या शाळेची शान वाढविली आहे. मराठी माध्यमाची मुले कुठेही जराही कमी नसतात हेच सृष्टीने जणू दाखवून दिले. तिचे शाळेला खुप खुप कौतुक असल्याचे मुख्याध्यापक बी. यु. शिरूरकर यांनी ‘लोकमत’शी बोलताना सांगितले.