छत्रपती संभाजीनगर : छत्रपती संभाजीनगरसह विभागातील आठ जिल्ह्यांतील ४ लाख ९४ हजार ९१८.३० हेक्टरवरील कापसासह रबी पिके, फळबागांना गेल्या महिन्यातील अवकाळी पावसाचा फटका बसला. यामुळे ९ लाख ६७ हजार ५६१ शेतकरी आर्थिक अडचणीत सापडले आहेत. या शेतकऱ्यांना ७०९ कोटी ९२ लाख ४१ हजार रुपयांचा मदतनिधी लागणार आहे.
विभागीय आयुक्तालयाने शासनाला निधी मागणीचा प्रस्ताव दिला असून, त्यावर अद्याप निर्णय झालेला नाही. २०२२ मध्ये अतिवृष्टी, सततच्या पावसामुळे शेतपिकांचे नुकसान झाले, तर गेल्या हंगामात दीड महिना पावसाचा खंड राहिल्याने खरीप हातून गेले. पुढे रब्बी हंगामात २६ नोव्हेंबर ते १ डिसेंबर २०२३ दरम्यान विभागात अवकाळी पावसाने हजेरी लावली. यात अनेक ठिकाणी अतिवृष्टी झाली. मराठवाड्यातील ४ लाख ७६ हजार ७७८.९८ हेक्टर जिरायत क्षेत्रावरील पिकांचे नुकसान अवकाळी पावसाने केले. ४ हजार २१८.७५ हेक्टरवरील बागायत क्षेत्राला, तसेच १३ हजार ९२०.५७ हेक्टवरील फळपिकांना फटका बसला.
जिल्हानिहाय बाधित शेतकरी व अपेक्षित निधीजिल्हा............ बाधित शेतकरी संख्या..... एकूण बाधित क्षेत्र......अपेक्षित निधीछत्रपती संभाजीनगर ..... २६४१९४ ...... १४८३६८.४१ ...... २०६००.५८जालना ....... २०७२१६ ...... १२३०९१.८७ ....... १९१७६.९३परभणी ....... २३१७८७ ....... ९५०५३.६७ ....... १३०८०.५९हिंगोली ...... २५७६२५ ....... १२३१६४.४० ...... १६७८६.६५नांदेड ..... ३९२२ ...... ३७५८.५० ....... ८८०.२६लातूर ..... ८८८ ......२६२.८९ ...... ३५.९१बीड ...... १७ ...... ९.९० ...... २.१९धाराशिव ...... १९१२ ..... १२०८. ६६ ....... ४२९.३०एकूण ..... ९६७५६१ ..... ४९४९१८.३० ....... ७०९९२.४१