लोकमत न्यूज नेटवर्कचंद्रपूर : कोरोना संशयित अथवा पॉॅझिटिव्ह रुग्णाच्या फुफ्फुसाच्या आत विषाणूने किती टक्के बाधित केले, याचे निदान करून पुढील उपचारासाठी एचआरसीटी तपासणी महत्त्वपूर्ण आहे. जिल्ह्यात कोरोनाचा उद्रेक झाल्याने ही तपासणी करून घेण्यासाठी चंद्रपुरातील चार खासगी हॉस्पिटलमध्ये तोबा गर्दी उसळली आहे. दररोज सुमारे तीन हजार तपासण्या होत असल्याची माहिती सूत्राने दिली.चंद्रपूर जिल्ह्यात कोरोना संसर्गाच्या दुसऱ्या लाटेत रुग्णांची संख्या प्रचंड वाढली. लक्षणे नसणारे व सौम्य लक्षणे असणारे पॉझिटिव्ह रुग्ण दिवसागणिक वाढतच आहेत. चंद्रपूर शहरातही रुग्णसंख्येने धडकी भरविली. शासकीय व खासगी कोविड रुग्णालये फुल्ल झाली. त्यामुळे लक्षणे नसणाऱ्या शहरातील शेकडो नागरिक एचआरटीसी चाचणीसाठी खासगी तपासणी केंद्रांमध्ये गर्दी करीत आहेत. दररोज सुमारे तीन हजार एचआरटीसी चाचण्या होत असल्याचा अंदाज आहे. चंद्रपूर महानगरपालिकेने दिलेल्या माहितीनुसार, शहरात डॉ. मानवटकर, डॉ. अल्लूरवार, डॉ. माडूरवार, डॉ. मेहरा हॉस्पिटलला सीटी स्कॅन, एचआरसीटी चाचणी करण्यास परवानगी आहे. दरम्यान, कोरोना प्रतिबंधक उपाययोजना व शासनाच्या नियमांचे पालन करूनच तपासण्या केल्या जात असल्याचा असा दावा मान्यताप्राप्त खासगी हॉस्पिटल्सने केला आहे.
एचआरसीटी टेस्ट म्हणजे काय?
कोरोना महामारीत एचआरटीसी टेस्ट एवढे महत्त्व का आले, असा प्रश्न पुढे आला आहे. चंद्रपुरातील एका प्रसिद्ध खासगी रेडिओलॉजिस्टने ‘लोकमत’ला दिलेल्या माहितीनुसार, एचआरसीटी टेस्टमध्ये छातीचे स्कॅनिंग केले जाते. यात फुफ्फुसामध्ये न्यूमोनियाचा संसर्ग किती प्रमाणात झाला याचे अचूक निदान होते.
परस्पर तपासणीने होम क्वारंटाईन अनेकांनी खासगी हॉस्पिटल्समधून परस्पर तपासणी करून घरीच उपचार करणे सुरू केले. संबंधित डॉक्टरांच्या प्रिस्क्रीप्शनशिवाय एचआरटीसी करण्यास परवानगी नाही. मात्र, कोरोनाच्या धास्तीने प्रिस्क्रीप्शनविना ही तपासणी होम क्वारंटाईन होण्याच्या घटना वाढल्याची माहिती पुढे आली.
न्यूमोनियातील फरक समजतोकोरोना झाल्यानंतरचा न्यूमोनिया आणि अन्य न्यूमोनियामध्ये फरक असतो. एचआरटीसी चाचणी केल्यानंतर हा फरक दिसून येतो. त्यामुळे ही चाचणी कोरोना प्रतिबंधासाठी अत्यंत महत्त्वाची मानली जाते. एचआरटीसी करण्यासाठी १५ ते २० मिनिटांचा कालावधी लागतो. रिपोर्ट मिळायलाही विलंब होत नाही, अशी माहितीही रेडिओलॉजिस्टने दिली.