चंद्रपूर : प्रेम प्रकरणातून दोघांनी एका अल्पवयीन मुलाची हत्या केल्याची घटना पडोली पोलिस स्टेशन हद्दीत घडली. छोटा नागपूर रोड पाइपलाइनजवळील पटेल वीटभट्टीच्या मागील बाजूला शुक्रवारी खून करून मृतदेह राखेमध्ये दाबून ठेवण्यात आला होता. ही घटना रविवारी उघडकीस आल्यानंतर पोलिसांनी चौकशी करून अवघ्या आठ तासांत दोन आरोपींना अटक केली आहे. या आरोपींमध्ये एक अल्पवयीन असल्याची माहिती मिळाली आहे.
मृत अल्पवयीन मुलगा ज्या मुलीवर प्रेम करत होता. त्याच मुलीवर आरोपीसुद्धा प्रेम करीत होते. आरोपीने त्याचा काटा काढण्यासाठी समझोता करण्याच्या बहाण्याने छोटा नागपूर परिसरात बोलावले. त्यानंतर त्यांच्यामध्ये भांडण झाले. या भांडणामध्ये आरोपींनी नेहरू नगर परिसरातील अल्पवयीन मुलाची शुक्रवारी हत्या केली. त्यानंतर मृतदेहावर परिसरात असलेली राख टाकून आरोपी पळून गेले. रविवारी परिसरात मृतदेह असल्याची माहिती पोलिसांना मिळाली. त्यानंतर पोलिस अधीक्षकांच्या मार्गदर्शनाखाली स्थानिक गुन्हे शाखेचे पोलिस निरीक्षक महेश कोंडावार यांनी या गुन्ह्याचा छडा लावण्यासाठी विविध पथके तयार करून रवाना केली होती.
घटनास्थळाची बारकाईने तपासणी करून तपासाला गती देण्यात आली. गोपनीय माहिती काढून प्रथम मृताची ओळख पटविण्यात आली. त्यानंतर पोलिसांना आरोपीपर्यंत पोहोचता आले. ही कारवाई पोलिस अधीक्षक, अपर पोलिस अधीक्षक, उपविभागीय पोलिस अधिकारी वरोरा यांच्या मार्गदर्शनाखाली पोलिस निरीक्षक महेश कोंडावार, सहायक पोलिस निरीक्षक मडावी, पोलिस उपनिरीक्षक विनोद भुरले, पोलिस हवालदार संजय आतकुलवार, नापोशि संतोष येलपुलवार, गजानन नागरे, निरीन रायपुरे, गोपाल आतकुलवार, कुंदनसिंग बावरी, रवींद्र पंधरे, प्रांजल झिलपे, नरेश डाहुले आदींनी केली. मागील दोन दिवसांमध्ये ही हत्येची चौथी घटना घटल्याने सर्वत्र खळबळ उडाली आहे.