चंद्रपूर : लग्नसमारंभ आटोपून मावशीला बोर्डा बोरकर येथे सोडण्यासाठी येत असलेल्या मोटरसायकलस्वाराने रस्त्याच्या मधोमध उभ्या असलेल्या हायवा ट्रकला धडक दिली. यामध्ये तरुण ठार तर महिला गंभीर जखमी झाल्याची घटना मंगळवारी रात्री नऊ वाजताच्या सुमारास देवाडा खुर्द गावाजवळ घडली.
गौरव नेताजी मेश्राम (२१, रा. भानसी, ता. सावली) असे मृतक तरुणाचे तर सुनीता रमेश आलाम (४५, रा. बोर्डा बोरकर, ता. पोंभूर्णा) असे गंभीर जखमी असलेल्या महिलेचे नाव आहे.
पोंभूर्णाजवळ असलेल्या थेरगाव येथील नातेवाइकाकडील लग्नसमारंभ आटोपून बोर्डा बोरकर येथे मावशी सुनीता आलाम यांना सोडण्यासाठी गौरव दुचाकीने जात होता. दरम्यान, देवाडा खुर्द गावाजवळ रस्त्याच्या मधोमध उभ्या असलेल्या हायवा ट्रक क्रमांक (एमएच ४० सीडी ०४८०) या ट्रकला धडक दिली. यामध्ये दोघेही गंभीर जखमी झाले. त्यांना तत्काळ पोंभूर्णा येथील ग्रामीण रुग्णालयात दाखल करण्यात आले. मात्र, डाॅक्टरांनी गौरवला मृत घोषित केले. गंभीर जखमी असलेल्या सुमीता आलाम यांना पुढील उपचारासाठी चंद्रपूरला हलविण्यात आले. घटनेचा पुढील तपास पोंभूर्णा पोलिस करीत आहेत.