चंद्रपूर : गुरुवारी रात्री १ वाजता वरोरा पोलीस ठाण्यात एक फोन येतो, की बोर्डा गावातील एका नगरीत एका घरी चोर शिरला आहे. त्यानुसार वरोरा पोलीस ठाण्यातील एक पथक घटनास्थळी रवाना होते. गावातील तरुणांच्या मदतीने रात्री १.३० वाजण्याच्या दरम्यान पोलीस घटनास्थळी दाखल होतात. त्या चोराला ताब्यात घेत पोलिसी खाक्या दाखविताच तो तरुण कबुली देतो, चोर नसून त्या घरातील मुलीचा प्रियकर असल्याची.
बोर्डा येथील एका कुटुंबातील मुलीची आई व भाऊ कामानिमित्त बाहेरगावी गेले. वडील व मुलगी एकटीच असल्याची संधी साधून एक तरुण रात्री एक वाजण्याच्या सुमारास घराच्या मागील मार्गाने घरात शिरला. ही बाब शेजाऱ्यांच्या लक्षात आल्याने त्यांनी घरमालकांना फोन करून सांगितले. शेजाऱ्यांच्या मदतीने त्या तरुणाला एका खोलीत बंद करून पोलिसांना माहिती देण्यात आली. पोलिसांनी त्या खोलीचे दार उघडून तरुणाला खोलीबाहेर आणत त्याला फटके देण्यास सुरुवात केली. त्यानंतर तो तरुण पोपटासारखा बोलायला लागला. सत्य कळल्यानंतर सर्वच अवाक् झाले. तो चोर नसून स्वतःला त्या मुलीचा प्रियकर असल्याचे सांगत आहे. हा तरुण यात्रा वार्ड, वरोरा येथील रहिवासी आहे. पोलिसांनी ताब्यात घेत त्याची दुचाकीदेखील जप्त केली. पुढील तपास पोलीस करीत आहेत.