गजानन साखरकर
घुग्घुस (चंद्रपूर) : कौटुंबिक कार्यक्रम आटोपून मारेगावकडे जाणाऱ्या बोलेरो वाहनाचा अचानक टायर फुटला. यामुळे बोलेरो वाहन अनियंत्रित होऊन दुभाजक ओलांडत विरुद्ध दिशेने येणाऱ्या ट्रकला आदळले. या अपघातात चार जणांचा जागीच मृत्यू झाला. ही घटना चंद्रपूर - घुग्घुस रस्त्यावर अहमद लाँनच्या वळणावर शुक्रवारी दुपारी १.३० वाजताच्या सुमारास घडली. मो. युसूफ शेख, त्यांच्या पत्नी मुमताज शेख, रफिक नबी शेख व त्यांच्या पत्नी संजीदा शेख सर्व रा. मारेगाव जि. यवतमाळ अशी मृतकांची नावे असून सर्व जण एकाच कुटुंबातील आहेत.
राजुरा येथे कौटूंबिक कार्यक्रमासाठी हे सर्व जण बोलेरो वाहनाने (क्र. एमएच २९ बीसी ६३२१) आले होते. कार्यक्रम आटोपून मारेगावला परत येत असताना पडोली-घुग्घुस रस्त्यावरील अहमद लाँनच्या वळणावर वाहनाचा समोरचा टायर फुटल्याने चालकाचे स्टेरींगवरून नियंत्रण सुटले व वाहन दुभाजकाला ओलांडून घुग्घुसकडून चंद्रपूरकडे जाणाऱ्या ट्रकला (एमएच ३४ बिजी ८२५१) आदळले. यात बोलेराे वाहनाचा समोरचा भाग चकनाचूर झाला. यात मो. युसूफ शेख, त्यांच्या पत्नी मुमताज शेख, रफिक नबी शेख व त्यांच्या पत्नी संजीदा शेख यांचा जागीच मृत्यू झाला.
कटरने वाहनाचा भाग कापून काढले मृतदेह
घटनेची माहिती मिळताच पडोली व घुग्घुस पोलीस घटनास्थळी दाखल झाले. यासोबतच नागरिकांचीही गर्दी उसळली. पोलिसांनी गर्दीवर नियंत्रण ठेवले. चारही जणांचे मृतदेह वाहनात फसून असल्याने कटरच्या साहाय्याने वाहनाचा काही भाग कापून मृतदेह काढावे लागले. तर वाहनाला क्रेनच्या साहाय्याने घटनास्थळावरून काढावे लागले. घटना पडोली हद्दीत येत असल्याने पडोली ठाण्यात गुन्हा दाखल करण्यात आला आहे.