शंकरपूर (चंद्रपूर) : येथून जवळच असलेल्या पिंपळगाव येथे वन्यजीव सांभरची शिकार करून मांस विकताना ११ जणांना सोमवारी दुपारी वनविभागाने ताब्यात घेतले. त्यांच्याकडून तीन किलो शिजवलेले मांस, तीन किलो कच्चे मांस, चामडे, डोके, पाय, सत्तूर, कुऱ्हाड, विळा आदी साहित्य जप्त करण्यात आले.
अरविंद तुकाराम ननावरे, निखिल महादेव जीवतोडे, अवचित सुभाष बारेकर, राजू घुग्घुसकर, रूपेश धारणे, एकनाथ बारेकर, सूरज हरी घरत, अभिषेक चंद्रभान नन्नावरे, नवतळा येथील शंकर मसराम, राजू वाढई, रामू राजेराम कुमरे असे ताब्यात घेतलेल्या व्यक्तींची नावे आहेत.
शंकरपूर येथून जवळच असलेल्या पिंपळगाव नवतळा येथे जंगल लागून आहे. या जंगल परिसरातील मदनापूर तलाव क्षेत्रात पाळीव कुत्र्याच्या साहायाने सांभरची शिकार करून मांस गावात आणून विक्री करण्याचा बेत काही जणांचा असल्याची माहिती वाईल्ड लाईफ प्रोटेक्शन सोसायटी व स्थानिक वन्यजीव प्रेमींना मिळाली. त्यांनी वनविभागाला माहिती दिली. त्या माहितीच्या आधारावर नवतळा येथील शंकर मेश्राम यांच्या घरी धाड टाकली असता, सांबरचे मांस चुलीवर शिजविताना आढळून आले.
ते संपूर्ण मांस जप्त करून त्याला ताब्यात घेतले. यावेळी त्याने मुख्य आरोपी पिंपळगाव येथील असल्याचे सांगितले. त्याच्या घरी धाड मारली असता, त्याठिकाणी तीन किलो शिजवलेले मांस, तीन किलो कच्चे मांस, चामडे, डोके, पाय, सत्तूर, कुऱ्हाड, विळा आदी साहित्य आढळून आले. ते सर्व साहित्य जप्त करण्यात आले. पुढील कारवाई वनपरिक्षेत्र अधिकारी नैताम यांच्या मार्गदर्शनाखाली वनक्षेत्र अधिकारी यू. बी. लोखंडे, नैताम वनरक्षक सोनुले, प्रदीप ढोणे करीत आहेत.