खामगाव : शेतीचा सातबारा देण्यासाठी शेतकर्‍याकडून दोन हजाराची लाच घेणार्‍या तलाठय़ाला अटक केली. ही कारवाई लाचलुचपत प्रतिबंधक विभागाच्या पथकाने आज १९ जून रोजी खामगाव येथे केली. स्थानिक समन्वय नगर नं. १ येथील राहणारे सतीश गणेश घाडे यांना बक्षीसपत्राने मिळालेल्या पाच एकर शेतीचा सातबारा व फेरफार नोंद घाडे यांच्या नावाने करण्यासाठी अंत्रज भाग दोनचे तलाठी सदाशिव फत्तुजी ठाकरे (वय ४६) रा.सर्मथ नगर खामगाव यांनी पाच हजार रुपयांची लाच मागितली होती. त्यातील तीन हजार रुपये घाडे यांना देण्यात आले होते. तर उर्वरित दोन हजार रुपयांसाठी शेतकर्‍याची अडवणूक करण्यात येत होती. त्यामुळे याबाबतची तक्रार सतीश घाडे यांनी लाचलुचपत प्रतिबंधक विभाग बुलडाणा यांच्याकडे २८ मे रोजी केली होती. या तक्रारीनुसार लाचलुचपत प्रतिबंधक विभागाच्या पथकाने सापळा रचला होता. सदर तलाठय़ास १९ जून रोजी २000 रुपयांची लाच स्वीकारताना शेगाव रस्त्यावरील तलाठी कार्यालयात रंगेहात पकडले. लाचेची रक्कम हस्तगत करुन तलाठी सदाशिव ठाकरे याच्याविरुद्ध गुन्हा दाखल करुन अटक करण्यात आली आहे. सदर कार्यवाहीत लाचलुचपत प्रतिबंधक विभागाचे पोलिस अधीक्षक अरविंद साळवे, अपर पोलिस अधीक्षक तडवी, एस. एल. मुंढे, भांगे, शेकोकार, नेवरे, गडाख सहभागी झाले.
दोन हजाराची लाच घेणारा तलाठी गजाआड
By admin | Updated: June 20, 2014 00:18 IST