खामगाव - भरधाव टिप्परने लक्झरी बसला जबर धडक दिली. यात सहा प्रवासी जखमी झाले असून, लक्झरी बसच्या दर्शनी भागाचे मोठ्याप्रमाणात नुकसान झाले. ही घटना सोमवारी सकाळी खामगाव- शेगाव रस्त्यावर घडली.
सोमवारी सकाळी खासगी कंपनीची एनएल ०१ बी १९१० या क्रमांकाची लक्झरीबस पुणे येथून शेगाकडे जात होती. त्याचवेळी विरूध्द दिशेने (शेगावकडून खामगावकडे येत असलेल्या) रेती वाहतूक करणाऱ्या टिप्परने लक्झरी बसला जबर धडक दिली. यात बसमधील चालकासह सहा प्रवासी जखमी झाले.
जखमींना तात्काळ खामगाव येथील उपजिल्हा सामान्य रूग्णालयात भरती करण्यात आले. प्रथमोपचारानंतर यापैकी चौघांना घरी सोडण्यात आले. तर दोघांवर सामान्य रूग्णालयात उपचार सुरू आहेत. गत दोन दिवसांपूर्वीच या रस्त्यावर उज्जैनकडे जाणारी खासगी बस उलटून सहा प्रवासी जखमी झाले होते. त्यानंतर लागलीच हा अपघात घडला.