बुलडाणा: ज्ञानगंगा अभयारण्यातील खामगाव वन परीक्षेत्रातंर्गत येत असलेल्या पिंपळगाव नाथ भागात गस्तीवर असलेल्या वन्यजीव विभागाच्या पथकावर ४० ते ४५ मेंढपाळांनी प्राणघात हल्ला करण्याचा प्रयत्न केल्यामुळे वनपरीक्षेत्र अधिकारी दीपेश लोखडे यांनी हवेत तीन फायर केले. त्यामुळे वन कर्मचाऱ्यांचा जीव वाचविण्यात त्यांना यश आले आहे.
ज्ञानगंगा अभयारण्यात मेंढ्या चारणाऱ्यांची संख्या अधिक आहे. दरम्यान वन्यजीव विभागाला मिळालेल्या गोपनीय माहितीच्या आधारावर वनपरीक्षेत्र अधिकारी दीपेश लोखंडे हे त्यांच्या सहकारी कर्मचाऱ्यांसह खामगाव वन्यजीव परीक्षेत्रातंर्गत गस्तीवर गेले होते. दरम्यान पिंपळगाव नाथ भागात काही मेंढपाळ चराई करत असल्याचे या गस्ती पथकाच्या दहा ऑगस्ट रोजी दुपारी निदर्शनास आले. त्यावेळी सबंधितांना हटकण्यात आले असता त्यांनी वन्यजीव विभागाच्या कर्मचाऱ्यांवर लाठ्या काठ्यांनी हल्ला चढवला. त्यामध्ये दोन वन्यजीव विभागाच्या कर्मचाऱ्यांना मेंढपाळांनी मारहाण सुरू केल्यामुळे वनपरीक्षेत्र अधिकारी दीपेश लोखंडे यांनी परिस्थीतीचे गांभिर्य पाहत हवेत पिस्तूलाचा एक फायर केला. त्यामुळे तेथील दहा ते १२ मेंढपाळ पळून गेले.
दरम्यान त्यांच्या काही साथीदारांना याी माहिती मिळाल्यानंतर जवळपास ४० ते ४५ जणांचा जमाव पुन्हा गस्ती पथकाच्या अंगावर आला. त्यांच्यावर लाठ्या काठ्या, शस्त्रे असल्याने वन्यजीव विभागाच्या कर्मचाऱ्यांच्या जीवित्वाला धोका निर्माण झाला होता. त्या पार्श्वभूमीवर परिस्थितीचे गांभिर्य पाहता दीपेश लोखंडे यांनी रिव्हॉलवरमधून पुन्हा हवेत दोन फायर केले. त्यामुळे हल्ला करणारे घटनास्थळावरून पळून गेले. या प्रकरणी वन गुन्हा दाखल करण्यात आला असून बोराखेडी पोलिसांनाही यासंदर्भात एक पत्रही वन्यजीव विभाग देणार असल्याचे लोखंडे यांनी सांगितले.
विशिष्ट आवाज करून बोलावले
प्रारंभी पळून गेलेल्या १० ते १५ व्यक्तींनी विशिष्ट आवाज करून त्यांच्या मदतीसाठी आणखी काही जणांना पिंपळनाथ भागात बोलावले. अवैधरित्या संरक्षणीत वनक्षेत्रात मेंढ्यांची चराई करण्याचा प्रघातच अलिकडील काळात पडला आहे. यापूर्वीही ज्ञानगंगा अभयारण्यात वन्य जीव विभागाच्या कर्मचाऱ्यांवर असे हल्ले झालेले आहेत. त्यामुळे एखादवेळी असा प्रसंग उद्भवल्यास आरोपी आरोपी विशिष्ट आवाज करून त्यांच्या सहकाऱ्यांना मदतीस बोलावत असल्याचे वनपरीक्षेत्र अधिकारी दीपेश लोखंडे यानी ‘लोकमत’शी बोलतांना सांगितले.
अभयारण्यात अवैध मेंढी चराईचे प्रमाण अधिक आहे. ही मंडळी स्थानिक वनकर्मचाऱ्यांचेही ऐकत नाहीत. वनकर्मचाऱ्यांनी त्यांना हटकल्यास ते वन कर्मचाऱ्यांच्या अंगावर धावून येतात. १० ऑगस्टला गस्तीवर असताना हे मेंढपाळ अभयारण्यात दिसले. त्यांना हटकण्याचा गस्तीवरील वनकर्मचाऱ्यांनी प्रयत्न केला. पण, ते अंगावर धावून गेल्याने वनकर्मचाऱ्यांना वाचविण्याकरिता हवेत तीन फायर करावे लागले. फायरनंतर ते मेंढपाळ घटनास्थळावरून पळून गेले.
- दीपेश लोखंडे, वनपरिक्षेत्र अधिकारी