चिंचपूरनजीक मलकापूर-पुणे बसला अपघात, ७ प्रवासी जखमी

चौघांवर जिल्हा सामान्य रुग्णालयात उपचार

मोताळा : मलकापूरवरून पुण्यासाठी निघालेल्या एसटी बसला मोताळा तालुक्यातील चिंचपूर फाट्यानजीक अपघात होऊन ७ प्रवासी जखमी झाल्याची प्राथमिक माहिती आहे.

जखमींवर बोराखेडी ग्रामीण रुग्णालयात प्रथमोपचार करण्यात येऊन बुलढाणा येथील जिल्हा सामान्य रुग्णालयात हलविण्यात आले आहे.१८ नोव्हेंबर रोजी सायंकाळी ७ वाजेच्या सुमारास हा अपघात चिंचपूर फाट्यावरील कमानीनजीक घडला. बसमधील काहींच्या म्हणण्यानुसार बस समोर आलेल्या दुचाकी चालकाला वाचविण्याच्या प्रयत्नात बस रस्त्याच्या कडेला असलेल्या खड्ड्यात गेली व अपघात झाल्याचे सांगण्यात येते.

तर काहींच्या सांगण्यानुसार बसचालक भ्रमणध्वनीवर बोलत होता. त्यावेळी समोर दुचाकी आल्यानंतर हा अपघात झाल्याचे सांगण्यात येत आहे. मात्र त्यास अधिकृत दुजोरा मिळाला नाही. एमएच-४०-एक्यू-६१३९ क्रमांकाची ही बस पुण्यासाठी जात होती. बसमध्ये नेमके किती प्रवाशी होते हे मात्र स्पष्ट होऊ शकले नाही.