लोकमत न्यूज नेटवर्क
खामगाव : प्रेमाच्या भावविश्वात रमत गप्पा करणाºया एका प्रेमीयुगलाची मुलीच्या घराकडील मंडळीने धुलाई केली. ही घटना नांदुरा बसस्थानकावर दुपारी २ वाजताच्या घडली. काही कळायच्या आत घडलेल्या या घटनेचा बघ्यांनी व्हिडीओही तयार केला. तर काहींनी हा व्हिडीओ चक्क सोशल मिडीयावर व्हायरल केला. यामुळे नांदुरा आणि परिसरात एकच खळबळ उडाली आहे.
नांदुरा येथील महाविद्यालयात ग्रामीण भागातील विद्यार्थी शिक्षणासाठी नियमित अपडाऊन करतात. यातील एक विद्यार्थीनी मंगळवारी दुपारी तिच्या मित्रासोबत गप्पा मारत होती. ही माहिती तिच्या घराकडील मंडळींना मिळाली. या माहितीच्या आधारे तिच्या नातेवाईकांनी बसस्थानक गाठले. दोघांनाही बोलताना रंगेहात पकडताच, दोघांनाही काही कळायच्या आत मारहाण करण्यास सुरूवात केली. मुलीसोबतच तिच्या सोबत बोलत असलेल्या युवकाचीही येथेच्छ धुलाई करण्यात आली. त्यानंतर मुलीचे नातेवाईक तिला घरी घेऊन गेले. या घटनेचे बघ्यांनी चित्रिकरणही केले. तर काहींनी लागलीच हा व्हिडीओ सोशल मिडीयावर व्हायरल केला. याप्रकरणी नांदुरा पोलिसांमध्ये रात्री उशीरापर्यंत कोणतीही तक्रार दाखल करण्यात आली नव्हती.
सामाजिक प्रतिष्ठेतून घडला प्रकार!
संबंधित मुलीच्या प्रेमप्रकरणाची भनक घरच्या मंडळीला लागली होती. त्यामुळे दोघांनाही यापूर्वी घरच्या मंडळींनी समज दिला होता. त्यानंतरही संबंधितांनी आपल्या वागणुकीत बदल केला नाही. त्यामुळे मुलीकडील मंडळी दोघांवरही पाळत ठेऊन होती. मंगळवारी हे दोघे बोलताना दिसताच त्यांना मारहाण करण्यात आली. सामाजिक प्रतिष्ठेतून हा प्रकार घडल्याची चर्चा आहे.
नांदुरा येथील बसस्थानकावर एका प्रेमी युगलाला मारहाण करण्यात आल्याची बाब आपल्या कानावर आली. याबाबत पोलिसात तक्रार दाखल नाही. त्यामुळे याप्रकरणी कोणतीही पोलिस कारवाई करण्यात आलेली नाही.
-सारंग नवलकार, पोलिस निरिक्षक, नांदुरा.