नांदुरा : सोमवारी तालुक्यातील तिकोडी शिवारात एका बिबट्याने प्रचंड धुमाकूळ घालून दहशत निर्माण केली होती. परिसरातील नागरिकांनी या बिबट्याला हाकलून लावल्याने तो पसार झाला होता. दुसर्‍या दिवशी मंगळवारी दिवसभर हा बिबट्या कुठेच आढळून न आल्याने जवळच असलेल्या बोथा जंगल शिवारात गेल्याची चर्चा परिसरात सुरु होती. मात्र हा बिबट तिसर्‍या दिवशी म्हणजे काल १८ जून रोजी काही लोकांना माळेगाव गोंड फाट्यावर दिसल्याने या बिबट्याची दहशत पुन्हा निर्माण झालीआहे. पंचायत समितीचे माजी सदस्य संजय कळस्कार यांच्या तिकोडी शिवारातील शेतात एका निंबाच्या झाडाखाली शेतात जाणार्‍या काही महिला मजुरांना एक बिबट आराम करीत असल्याचे सोमवारी आढळून आले. बिबट दिसताच या महिलांनी आरडाओरड केल्याने बिबट्याने त्याच झाडावर चढून आश्रय घेतला. बिबट असल्याची माहिती वार्‍यासारखी परिसरात पसरल्याने ग्रामीण भागासह शहरातील नागरिकांनीही त्याला पाहण्यासाठी घटनास्थळी मोठी गर्दी केली होती. त्याला पकडण्यासाठी वनविभागालाही पाचारण करण्यात आले होते. मात्र झाडाच्या शेवटच्या फांदीवर त्याने आश्रय घेतल्याने त्याला पकडण्यात वनविभागाला अपयश आले. दुपारी तिकोडी परिसरातील लोकांनी हा बिबट झाडाखाली येताच त्याला हाकलून लावले होते. त्याला हाकलून लावतांना त्याने केलेल्या हल्यात वनकर्मचारी व गावकरी असे दोघेजण जखमी झाले होते. त्यानंतर मात्र रात्रीच्या अंधारात हा बिबट पसार झाला होता. त्याला जेरबंद करण्यात वनविभाग अपयशी ठरल्याने परिसरात दहशतीचे वातावरण कायम होते. मात्र तो दिवसभरात दूरवर परिसरात कुठेच आढळून न आल्याने तो जवळच असलेल्या बोथा जंगलात निघून गेल्याची चर्चा सुरु होती. परंतु तिसर्‍या दिवशी म्हणजे काल बुधवारी तो सायंकाळचे सुमारास माळेगाव गोंड फाट्यावर काही लोकांना आढळून आला. त्यामुळे परिसरात त्याची पुन्हा दहशत निर्माण झाली आहे. सध्या पेरणीचे दिवस असल्याने शेतमजुरांमध्ये भीतीचे वातावरण पसरले आहे. वनविभागाने या बिबट्याचा तात्काळ बंदोबस्त करुन त्याच्या दहशतीतून आमची सुटका करावी, अशी मागणी परिसरातील नागरिकांनी केली आहे.
बिबट्याची दहशत कायम
By admin | Updated: June 20, 2014 00:15 IST