इंडस्ट्रिजमधील सोयाबीन व तूर कुटाराला आग

दोन एकरावरील हजारो क्विंटल सोयाबीन व तुरीचे कुटार जळून सुमारे २७ लाखाची हानी झाली.

खामगाव : शहरानजीक वरखेड शिवारातील सिद्धीविनायक कॉलेजनजीक असलेल्या के.डी. के. इंडस्ट्रिज परिसरातील सुमारे दोन एकरावरील हजारो क्विंटल सोयाबीन व तुरीचे कुटार जळून सुमारे २७ लाखाची हानी झाली. ही घटना आज दुपारी २ वाजताच्या सुमारास घडली. तब्बल सहा तासांच्या प्रयत्नानंतरही आग विझत नसल्याचे पाहून अखेर प्रयत्न थांबविण्यात आले. शेगाव रस्त्यावर अभिषेक देशमुख रा.सिव्हिल लाईन यांच्या मालकीची के.डी.के. इंडस्ट्रिजमध्ये कुटारापासून बॉयलरसाठी जळतन लाकडाला पर्याय म्हणून लागणारे गट्ट (व्हाईट कोल) बनविले जाते. यासाठी इंडस्ट्रिजला लागून असलेल्या दोन एकराच्या परिसरात हजारो क्विंटल सोयाबीन व तुरीचे कुटार ठेवण्यात आले होते; दरम्यान आज १९ जून रोजी दुपारी २ वाजताच्या सुमारास अचानक आग लागली. आग विझविण्यासाठी खामगाव येथील अग्निशामक विभागाच्या गाडीला बोलविण्यात आले; मात्र आग आटोक्यात येत नसल्याचे पाहून खामगाव अग्निशामक विभागाची दुसरी त्याचप्रमाणे शेगाव येथील एक गाडी अशा तीन गाड्यांद्वारे ९ ते १0 खेपा पाणी वापरुनही सहा तासांच्या अथक प्रयत्नानंतरही आग आटोक्यात आली नाही. त्यामुळे कुटार आगीच्या हवाली झाले. यामध्ये सुमारे २७ ते २८ लाखाचे नुकसान झाल्याचा अंदाज आहे. तर आग इंडस्ट्रिजपर्यंत पोहोचू नये म्हणून सुरक्षिततेचा उपाय म्हणून अग्निशामकच्या गाड्या घटनास्थळी ठेवण्यात आल्या होत्या.