खामगाव - येथील कृषी उत्पन्न बाजार समिती मागील रस्त्यावर असलेल्या भुसावळ चौकातील टपऱ्यांना मंगळवारी दुपारी साडे अकरा वाजता अचानक आग लागली. पाहता पाहता वाऱ्यासारख्या पसरलेल्या आगीने क्षणार्धात रौद्र रूप धारण केले. त्यामुळे अनेक टपऱ्या जळून खाक झाल्या. वेळीच ही आग आटोक्यात आणण्यात आली. त्यामुळे पुढील अनर्थ टळला.
खामगाव शहरातील भुसावळ चौकातील कोंडवाड्या जवळ चहा, नास्त्याचया दुकानांसोबतच काही टिंबरची दुकाने आहेत. यातील काही टपऱ्याना दुपारी साडेअकरा वाजता अचनाक अाग लागली. या आगीत काही टपर्यांची क्षणार्धात राखरांगोळी झाली. आग विझविण्यासाठी आसपासच्या परिसरातील नागरिकांनी वेळेवर धावपळ केली. त्यानंतर अग्नीशमन विभागाचा बंब घटनास्थळी पोहोचला. दुपारी बारा वाजता आगीवर नियंत्रण मिळविण्यात यश आले. या आगीत मोठयाप्रमाणात हानी झाल्याची शक्यता वर्तविण्यात येत असून ही आग नेमकी कशामुळे लागली, याचे निश्चित कारण समजू शकले नाही.