चांडोळ : आज अचानक वादळी वार्‍यासह पाऊस झाला. या दरम्यान वीज पडून येथील ग्रामपंचायत सदस्य बाबूसिंग डोंगरसिंग चांदा यांचा जागीच मृत्यू झाला. ही घटना आज सायंकाळी ६.३0 वाजेच्या सुमारास चांडोळ येथे त्यांच्या घरापुढे घडली. ग्राम चांडोळ येथे आज सायंकाळी पावसाचे वातावरण तयार होऊन वादळी वार्‍यासह पाऊस पडला. या दरम्यान येथील ग्रा.पं.सदस्य बाबूसिंग डोंगरसिंग चांदा(वय ४२) हे आपल्या घरासमोर असणार्‍या गाठय़ात जनावरांना बांधण्याकरता बाहेर आले. यावेळी अचानक त्यांच्या अंगावर वीज पडली. यामध्ये ते गंभीर जखमी झाले. कुटुंबातील लोकांनी त्यांना तत्काळ गावातील डॉक्टरकडे नेले असता त्यांना मृत घोषित करण्यात आले. आज चांडोळ आणि परिसरात एक तास मुसळधार पाऊस झाला. यात वीज पडून ग्रा.पं.सदस्य चांदा यांचा मृत्यू झाल्याने गावात सर्वत्र हळहळ व्यक्त होत आहे. घटनेची माहिती कळताच ग्रामस्थांनी घटनास्थळी एकच गर्दी केली. मृतक बाबूसिंग चांदा यांच्या पश्‍चात दोन मुले, मुलगी, पत्नी, आई असा आप्तपरिवार आहे. गावातील समाजकारण आणि राजकारणात त्यांचा मोठा सहभाग होता. त्यांच्या अपघातातील मृत्यूमुळे सर्वत्र शोक व्यक्त होत आहे. बुलडाणा तालुक्यातील ग्रामीण भागात आज काही ठिकाणी वादळीवार्‍यासह तुरळक पावसाच्या सरी कोसळल्या. त्यामुळे काही घरावरील टिनपत्रे उडाल्याने नुकसान झाले आहे.
वीज पडून ग्रामपंचायत सदस्याचा मृत्यू
By admin | Updated: June 14, 2014 23:45 IST