खामगावात दोन प्रेमी युगुलांवर कारवाई दामिनी पथकाची कारवाई

शेगाव रोडवरील 'द फुड स्टोरी रेस्टो' या कॅफेमध्ये प्रेमी युगुल संशयास्पद रितीत बसले असल्याची माहिती दामिनी पथकाला मिळाली.

खामगाव: शेगाव रोडवरील एका कॅफेमध्ये संशयास्पद स्थितीत आढळून आलेल्या दोन प्रेमी युगुलांना दामिनी पथकाने पकडले. यातील मुलींना समज देऊन सोडून देण्यात आले. तर दोन मुलांवर कारवाई करण्यात आली. ही घटना बुधवारी सकाळी उघडकीस आली.

प्राप्त माहितीनुसार, शेगाव रोडवरील 'द फुड स्टोरी रेस्टो' या कॅफेमध्ये प्रेमी युगुल संशयास्पद रितीत बसले असल्याची माहिती दामिनी पथकाला मिळाली. या माहितीची खात्री पटल्यानंतर छापा मारला. यावेळी माठिकाणी असभ्य वर्तन करणार्या दोन प्रेमी युगुलांना ताब्यात घेऊन, शहर पोलीस स्टेशनला नेण्यात आले. यामध्ये मुलींच्या पालकांना पोलीस स्टेशनला बोलाविण्यात आले. त्यानंतर दोन्ही मुलींना पोलीसांनी समज देत सोडून दिले. तर दोन्ही मुलांवर ११०, ११७ नुसार प्रतिबंधात्मक कारवाई केली. त्याचवेळी कॅफे मालकाला यापुढे असे प्रकार घडल्यास कठोर कारवाईचा इशारा देण्यात आला. 

शहरातील कॅफे दुर्लक्षीत

खामगाव शहरातील नांदुरा रोड, डीपी रोडवरील कॅफे सोबतच काही सदनिका आणि इमारतींमध्ये प्रेमी युगुलांचा धुडगुस राहतो. काही दिवसांपूर्वीच जलंब नाक्यावरील एका इमारतीत कारवाई करण्यात आली होती. मात्र, सिव्हील लाइन, डीपी रोड आणि नांदुरा रोडवरील काही विशिष्ट कॅफेवर कारवाई करण्याची मागणी आता जोर धरू लागली आहे. दरम्यान, यासंदभार्त काही तक्रारी शहर पोलीस स्टेशनकडे स्थानिकांनी केल्या आहेत. मात्र, याकडे पोलीसांचे दुर्लक्ष होत असल्याने, सिव्हील लाइन सारख्या भागातही प्रेमी युगुलांचा धुडघुस वाढल्याची ओरड शहरवासिय करीत आहेत.