सदानंद सिरसाट, मलकापूर (बुलढाणा): नांदुरा रस्त्यावरील रेल्वे उड्डाणपुलानजीक अज्ञात वाहनाने दुचाकीला चिरडल्याची घटना सोमवारी रात्री ९.३० वाजता घडली. या अपघातात एकजण जागीच ठार झाला, तर एक गंभीर जखमी झाला. त्याला खाजगी रुग्णालयात उपचारासाठी दाखल करण्यात आले आहे.
शहरातील गाडेगाव मोहल्ल्यातील रहिवासी वीरेंद्रसिंह संग्रामसिंह राठोर (४०), योगेश रवींद्र टप (२५) हे दोन्ही इलेक्ट्रॉनिक दुचाकीने शहरात प्रवेश करण्याच्या मार्गावर होते. राष्ट्रीय महामार्गावरील रेल्वे उड्डाणपुलानजीक मलकापूर शहरात येणाऱ्या सर्व्हिस रस्त्यावर पाठीमागून भरधाव आलेल्या अज्ञात वाहनाने दुचाकीला चिरडले. अपघात एवढा गंभीर स्वरूपात घडला की त्यात अज्ञात वाहनाने अक्षरशः पाचशे फुटांपर्यंत दुचाकी फरफटत नेली अन् पोबारा केला.
या घटनेची माहिती मिळताच पोलिस निरीक्षक विलास पाटील यांच्या नेतृत्वात पोलिस पथक घटनास्थळी दाखल झाले. घटनेत वीरेंद्रसिंह संग्रामसिंह राठोर याचा जागीच मृत्यू झाल्याने त्याला शवविच्छेदनासाठी उपजिल्हा रुग्णालयात हलविण्यात आले, तर गंभीर जखमी योगेश टप याला उपचारासाठी खाजगी रुग्णालयात दाखल केले. ही घटना घडल्यानंतर गाडेगाव मोहल्ल्यातील नागरिकांनी उपजिल्हा रुग्णालयात एकच गर्दी केली होती. पोलिस अज्ञात वाहनाचा शोध घेत आहेत.