मोताळा : भरधाव दुचाकीचा अपघात झाल्याने २५ वर्षीय युवकाचा मृत्यू झाला. ही घटना २१ जानेवारी राेजी रात्री माेताळा येथील ग्रामीण रुग्णालयासमोर निर्माणाधीन पुलाजवळ घडली. शे. अनसार शे. मुसा (रा. कोथळी) असे मृतक युवकाचे नाव आहे.
मोताळा तालुक्यातील कोथळी येथील शे. अनसार शे. मुसा हे २१ जानेवारी रोजी कामानिमित्त मोताळा येथे आले होते. येथील ग्रामीण रुग्णालयासमोर पुलाचे काम सुरू आहे. त्यामुळे रस्त्यावर पुलाच्या दोन्ही बाजूंनी मध्य भागापर्यंत मुरुमाचा आडवा बांध टाकण्यात आलेला होता. शे. अनसार हे कॉटन मार्केट रोडवरून परत येत असताना रात्रीची वेळ असल्याने पुलावर आडवा टाकलेला मुरुमाचा बांध त्यांना अंधारात दिसला नाही. त्या बांधावरून शे. अनसार यांची दुचाकी जोरात आदळली. त्यानंतर दुचाकीवरील अनसार हे खाली फेकल्या गेल्याने त्याच्या डोक्याला जबर मार लागून ते गंभीर जखमी झाले. माहिती मिळताच बोराखेडी ठाणेदार सारंग नवलकर, नापोकाॅ विजय पैठणे, पोकॉ अभिनंदन शिंदे, दीपक पवार यांनी घटनास्थळी धाव घेत अपघातातील जखमीला नागरिकांच्या मदतीने उपचारासाठी बुलढाणा येथे हलविले. तेथे डॉक्टरांनी तपासून त्यांना मृत घोषित केले.
फलक असता तर वाचला असता जीव
येथील ग्रामीण रुग्णालयासमोर पुलाचे काम सुरू आहे. त्यामुळे त्याठिकाणी मुरुमाचा आडवा बांध टाकण्यात आलेला आहे. याठिकाणी संबंधितांनी काम सुरू असल्याचे कोणतेही फलक लावलेले नाही. तसेच रात्रीची वेळ असल्याने मुरुमाचा आडवा बांध या दुचाकी चालकास दिसला नसल्याने हा अपघात घडला आहे. रस्त्याचे काम चालू असल्याचे फलक लावलेले असते तर दुचाकीचा अपघात घडला नसता आणि दुचाकी चालकाचे प्राण वाचले असते, असे सांगत मृतकाच्या नातेवाइकांनी संबंधित ठेकेदारावर रोष व्यक्त केला आहे.