सोंड्याटोला प्रकल्पाच्या इमारतीला भेगा

महत्वाकांक्षी सोंड्याटोला उपसा सिंचन प्रकल्पाच्या इमारतीला भेगा पडल्या आहेत.

रंजित चिंचखेडे  चुल्हाड (सिहोरा) महत्वाकांक्षी सोंड्याटोला उपसा सिंचन प्रकल्पाच्या इमारतीला भेगा पडल्या आहेत. यामुळे विद्युत उपकरणे असणाऱ्या पॅनेल विभागात पाण्याचे डबके तयार झाल्याने कंत्राटी कामगारात भीती निर्माण झाली आहे. या प्रकल्पस्थळात जबाबदार अधिकाऱ्यांचे भेटी दुर्लभ असल्याची माहिती मिळाली आहे. यामुळे प्रकल्प वाऱ्यावर सोडण्यात आल्याचे चित्र दिसून येत आहे.विदर्भ वैधानिक विकास महामंडाच्या अखत्यारित असलेल्या सिहोरा परिसरातील बावनथडी नदीवर महत्वाकांक्षी सोंड्याटोला उपसा सिंचन प्रकल्प ११० कोटी खर्चून साकारण्यात आलेला आहे. गेल्या २००७ पासून प्रकल्प नदी पात्रातून पाण्याचा उपसा करित आहे.या प्रकल्पावर नियंत्रण जिल्हा बाहेरील विभाग मार्फत ठेवण्यात येत आहे. एकंदर प्रकल्प वाऱ्यावर सोडण्यात आल्याचे दिसून येत आहे. सध्या प्रकल्प स्थळात नदी पात्रातून पाण्याचा उपसा करण्यासाठी ९ पैकी ५ पंपगृह सुरु करण्यात आले आहे. उर्वरीत ४ पंपगृहाचे देखभाल दुरुस्ती करण्यात येत आहे. यामुळे या पंपगृहाला १५ दिवसाचा कालावधी लागणार आहे. बावनथडी नदी पात्रात अल्प जलसाठा उपलब्ध आहे. बुंदबुंद पाणी उपसा करण्याची ओरड शेतकरी करीत आहेत. मार्च - एप्रिल महिन्यात पंपगृहाची देखभाल व दुरुस्ती करण्यात आली नाही. ऐन पावसाळ्यात या कामांना सुरुवात करण्यात आल्याने प्रकल्पस्थळाकडे दुर्लक्ष करण्यात येत असल्याचा ठपका ठेवण्यात आलेला आहे. विदर्भ वैधानिक विकास महामंडळात कार्यरत उपविभागीय अभियंता पी.एन. लांजेवार यांचेकडे या प्रकल्पाची धुरा आहे. परंतु त्यांचेकडे अवाढव्य कामांचा व्याप असल्याने जबाबदार अधिकारी तथा अधिनस्थ कर्मचाऱ्यांचा प्रकल्पस्थळात फेरफटका दुर्लभ झालेला आहे.यामुळे २ आॅपरेटर्स व ३ सुरक्षा गार्ड या कंत्राटी कामगारांच्या खांद्यावर प्रकल्पाचे ओझे देण्यात आले आहे. रात्र आणि दिवस प्रकल्पस्थळात ५ पंपगृह सुरु आहेत. या शिवाय प्रकल्पाला पाणी पुरवठा करणाऱ्या धरणाचे दरवाजे बंद करण्यात आली आहे. यामुळे धरणात पाण्याची पातळी चढउतार होत आहे. बावनथडी नदीपात्रात पाण्याचे स्त्रोत नाले आहेत. यामुळे पात्रात बारमाही वाहणारे पाण्याचे स्त्रोत नाहीत. यंदा पावसाचे अल्प प्रमाण असल्याने प्रकल्पात उपसा करण्यात येणाऱ्या पाण्याकडे शेतकऱ्यांचे नजरा लागलेला आहे.प्रकल्पस्थळात पंपगृहाना आॅपरेट करणारा पॅनल विभाग आहे. दुसऱ्या व अंतिम माळ्यावर हा विभाग आहे. या विभागात छताला भेगा पडल्या आहेत. या भेगामुळे इमारतीचे दोन भागात विभागणी झाली आहे. पॅनल विभागात याच भेगामधून पाण्याची गळती होत आहे. विद्युत तथा महत्वपूर्ण उपकरणे असणाऱ्या या विभागात होणारी पाण्याची गळती धोकादायक असल्याचे कार्यरत कंत्राटी आॅपरेटर्स यांनी सांगितले. या मुळे त्यांचे जीवन वेशीवर टांगल्या जात आहे. महत्वपूर्ण प्रकल्पस्थळात जबाबदार कर्मचारी २४ तास सेवा बजावत नसल्याचे दिसून येत आहे. सर्वसर्वा सध्या स्थित कंत्राटी कामगार आहेत. या प्रकल्प स्थळात रोज लोकप्रतिनिधी शेतकरी यांचे भेटी वाढल्या आहेत. त्यांचे संवादाना आॅपरेटर्स यांना सामोरे जावे लागत आहे. यामुळे आलबेल सुरु आहे.वसाहत भंगारातप्रकल्पाचे बांधकाम करताना कामगारांसाठी वसाहतीचे निर्माण करण्यात आले आहे. कंत्राटदाराचे कामे पूर्ण होताच वसाहत भंगारात निघाली आहे. या वसाहतीकडे दुर्लक्ष झाले आहे. लाखो रुपये खर्चून या इमारतीचे वारे न्यारे होत आहे. दरम्यान विश्रांतीकरिता साधने नसल्याने कंत्राटी कामगार २४ तास प्रकल्पस्थळातच मुक्काम ठोकत आहे. या वसाहतीची पुर्नबांधणी करण्याची गरज आहे.प्रकल्पस्थळात चढ-उतारसध्या प्रकल्पस्थळात पाणी अभावी चढ उतार सुरु आहे. पंपगृहाला पाण्याची गरज आहे. धरणाचे प्रथम दरवाजे बंद करण्यात आली आहे. उर्वरीत दरवाजे खुली ठेवण्यात आली आहे. पाण्याची गरज असताना यंत्रणेचे नियोजन शून्यतेमुळे अनेक संकटांना सामोरे जाण्याची वेळ येणार आहे.