भंडारा : आपल्या लहानग्या ५ वर्षे वयाच्या मुलाला शेजाऱ्याने गालावर थापड मारली. यामुळे संताप अनावर झालेल्या वडिलाने चक्क डोक्यावर रॉडने प्रहार करून शेजाऱ्याचा खून केला. एवढेच नाही तर या मारहाणीत मध्यस्ती करायला आलेल्या त्या शेजाऱ्याच्या पत्नीला आणि मुलालाही गंभीर जखमी केले. हा थरार गुरुवारी सायंकाळी ६:१५ वाजेच्या सुमारास खांबतलाव परिसरातील राणी लक्ष्मीबाई वॉर्डात घडला.
शालिकराम सहारे (६०) असे मृताचे नाव आहे, तर हल्लेखोराचे नाव अक्षय शाहू (२५) असे आहे. जखमी झालेल्यांमध्ये शालिकराम सहारे यांची पत्नी मीराबाई (५५ वर्षे) आणि मुलगा किशोर (४० वर्षे) यांचा समावेश आहे.
अक्षय एका सर्व्हिसिंग सेंटरमध्ये काम करतो, तर सहारे कुटुंब मजुरी करते. हे दोन्ही कुटुंब शेजारी राहतात. गुरुवारी सायंकाळी काही कारणांवरून शालिकराम यांनी अक्षयच्या लहानग्या मुलाला गालावर थापड मारली. गालावर उमटलेले वळ पाहून अक्षयचे डोके भडकले. हातात रॅड घेऊन तो जाब विचारण्यासाठी गेला आणि मारायला सुरुवात केली. यात वर्मी घाव बसल्याने शालिकरामचा जागीच मृत्यू झाला. त्याला वाचविण्यासाठी गेलेली पत्नी आणि मुलगाही यात जखमी झाल्याची माहिती आहे.
हा प्रकार सुरू असताना परिसरातील नागरिकांची गर्दी झाली होती. पोलिसांना माहिती कळताच त्यांनी घटनास्थळी धाव घेतली. पोलिस अधीक्षक लोहित मतानी, पोलिस निरीक्षक गोकुळ सूर्यवंशी यांनी घटनास्थळ गाठून घटनेची माहिती घेतली. शालिकराम आणि अन्य दोन्ही जखमींना रुग्णालयात दाखल केले. मात्र, डॉक्टरांनी शालिकरामला मृत घोषित केले. अन्य दोघांवर उपचार सुरू आहेत.
आरोपीला अटक
दरम्यान, सायंकाळी आरोपी अक्षय शाहू याला अटक करण्यात आल्याची माहिती जिल्हा पोलिस अधीक्षक लोहीत मतानी यांनी दिली. या भांडणामागे अन्य कोणता वाद होता का, याचाही तपास पोलिस करीत आहेत.