देवानंद नंदेश्वर
भंडारा : गणेशपूर येथील तेलमासरे दाम्पत्य दुचाकीने स्वगृही जात असताना मागेहून येणाऱ्या कंटेनरने दुचाकीला धडक दिली. यात ४८ वर्षीय विवाहितेचा जागीच मृत्यू झाला. ही घटना रविवारी एक वाजताच्या सुमारास राष्ट्रीय महामार्ग क्रमांक ५३ वरील भंडारा जिल्हा परिषद चौकानजिकच्या प्रवासी निवाऱ्यासमोर घडली.
वंदना चंदूलाल तेलमासरे (४८) रा. गणेशपूर, असे मृत महिलेचे नाव आहे. चंदूलाल तेलमासरे व त्यांची पत्नी वंदना दुचाकी क्रमांक एमएच ४० व्ही ४३६० ने जिल्हा परिषद चौकातून पटवारी भवनाकडे जात होते. दरम्यान जिल्हा परिषद चौकानजिकच्या प्रवासी निवाऱ्याजवळ कंटेनर क्रमांक एमएच ०४ एलई ०७८० ने दुचाकीला मागेहून जोरदार धडक दिली. त्यामुळे दुचाकीवरील वंदना तेलमासरे कोसळल्याने त्यांच्या डोक्याला गंभीर मार लागला. त्यांची घटनास्थळी प्राणज्योत मालवली.
घटनेची माहिती भंडारा पोलिसांना होताच सहाय्यक पोलिस निरिक्षक धनंजय पाटील, हवालदार आशिष तुमाने, िशिपाई विठ्ठल हेडे यांनी घटनास्थळ गाठून पंचनामा केला. मृतदेह शवविच्छेदनासाठी जिल्हा रुग्णालयात पाठविण्यात आले. घटनेची माहिती गणेशपूर येथे होताच घटनास्थळावर नागरिकांची गर्दी झाली होती. मृत वंदना तेलमासरे यांच्या मागे पती, एक मुलगा, एक मुलगी असा आप्त परिवार आहे. घटनेची नोंद भंडारा पोलिसांनी केली असून कंटेनर चालकाविरुध्द गुन्हा दाखल केला आहे.