तुमसर : नगर परिषद, तुमसर ही कोणत्या न् कोणत्या कारणांमुळे नेहमीच चर्चेत राहते, असाच एक प्रकार येथील प्रभाग क्रमांक ९ मधील दुर्गा नगर व श्रीरामनगर येथील सिमेंट रोड बांधकामासंदर्भात तेथील नगरसेवकांना कसलीही माहिती न देता अंदाजपत्रकाला डावलून जोमाने रस्त्याचे बांधकाम सुरू आहे. त्यासंदर्भात तेथील नागरिकांनी नगरसेवकाकडे तक्रार केली असता सदर प्रकार उघडकीस आला.
तुमसर नगर परिषदेंतर्गत असलेल्या प्रभाग क्रमांक ९ दुर्गा व श्रीरामनगर येथील भोरगडे ते सिंगनजुडे हे सिमेंट रस्त्याचे काम विशेष रस्ता अनुदानांतर्गत स्थानिक नगरसेवकांना माहिती न देता, तसेच अंदाजपत्रकाला डावलून नियमबाह्यरीत्या कंत्राटदारामार्फत सिमेंट रस्त्याचे काम अति जलदगतीने सुरू करण्यात आले. तेथील नागरिकांनी स्थानिक नगरसेवकाकडे बांधकामाबाबतची तक्रार केली असता नगरसेवक बोरकर हे स्वतः बांधकामस्थळी पोहोचले असता सदर बांधकाम निकृष्ट दर्जाचे आढळून आल्याने बांधकाम बंद करण्यास सांगितले. मुख्याधिकारी व बांधकाम अभियंत्यांना भ्रमणध्वनी करून सांगितले असता काही वेळ काम बंद करून परत काम सुरू करण्यात आले. याबाबत गट नेते रगडे यांना माहिती दिली. मात्र, सिमेंट रस्त्याचे बांधकाम जलद गतीने सुरू असल्याने उलटसुलट चर्चा सुरू आहे. या भोंगळ कारभाराबाबत काँग्रेसचे प्रदेश सचिव प्रमोद तितीरमारे यांनी दखल घेऊन रस्त्याची वरिष्ठांकडे तक्रार करून बांधकामाची चौकशी करण्याची मागणी केली आहे.