गोपालकृष्ण मांडवकर
भंडारा : शहरातील गांधी चौकात दुर्गा लस्सी नावाने व्यवसाय करणाऱ्या अमन नंदुरकर नामक २३ वर्षीय युवकाची पोटात चाकू भोसकून हत्या करण्यात आली. या घटनेनंतर जमावाने हत्या करणाऱ्या मुलांपैकी अभिषेक साठवणे या १८ वर्षीय युवकाला पकडून बेदम मारहाण केली. यात तो देखील गंभीर जखमी झाला आहे. यामुळे शहरात एकच खळबळ उडाली.
रात्री सव्वादहा वाजताच्या सुमारास गांधी चौकात ही घटना घडली. आदल्या दिवशी शनिवारी अमनच्या स्टॉलसमोर काही युवकांचा आपसात वाद झाला. होता. यादरम्यान अमन नंदुरकर यालाही मारहाण करण्यात आली होती. हे प्रकरण तिथेच थांबले असताना रविवारी रात्री सव्वादहा वाजताच्या सुमारास अभिषेक साठवणे आणि इतर तीन ते चार युवक अमनच्या लस्सी सेंटर असलेल्या स्टॉलजवळ आले. कालच्या भांडणाबद्दल कॉम्प्रमाईज करायचे आहे, असे सांगून त्यांची चर्चा सुरू झाली. मात्र समेट न होता उलट भांडण बरेच वाढत गेले. या भांडणातच अभिषेकने आपल्या जवळील चाकू काढला आणि अमनच्या पोटातच भोसकला. यामुळे तो रक्तबंबाळ होऊन पडला. ही घटना घडल्यावर परिसरातील नागरिकांनी धाव घेतली आणि अभिषेकला पकडले व मारहाण केली. या दरम्यान त्याचे साथीदार पळून गेले.
नागरिकांनी आणि नातेवाईकांनी आमनला रुग्णालयात उपचारासाठी नेले असता डॉक्टरांनी त्याला मृत घोषित केले. तो मरण पावल्याचे कळतात पुन्हा जमावाने अभिषेकची बेदम धुलाई केली. यामुळे तो गंभीर जखमी झाला. अभिषेकवरही जिल्हा सामान्य रुग्णालयात उपचार सुरू आहेत. या घटनेमुळे बराच तणाव निर्माण झाला आहे. अनुचित घटना घडू नये म्हणून पोलिसांनी चौकात मोठ्या प्रमाणावर बंदोबस्त लावला आहे. सध्या परिस्थिती नियंत्रणात आहे.