स्वप्न म्हणजे काय? तर दिवसभर मनात घोळणाऱ्या विचारांचा चलपट. विचार कोणते तर सगळ्या प्रकारचे. जे विचारांच्या पलीकडे आहे त्यांचेही विचार मनात घोळतात आणि अशा गोष्टी स्वप्नात दिसतात. न पाहिलेले स्थान दिसते, न पाहिलेल्या व्यक्ती दिसतात, कधीतरी प्रत्यक्षात पाहताना या गोष्टी आधीच पाहिल्याचा भास होतो. अशी ही स्वप्नांची अजब गजब आणि गूढ दुनिया आहे. स्वप्नशास्त्रात त्याचा सखोल अभ्यास केला जातो. त्यात वेगवेगळ्या स्वप्नांमागे असलेली कारणे शोधण्याचा प्रयत्न केला जातो तसेच भाकीतही वर्तवले जाते. चांगले वाईट स्वप्न पडण्यामागे भविष्यातील घटनांचाही वेध घेतला जातो. अशातच एक विचित्र आणि घाम फोडणारे (Scary Dreams) स्वप्न म्हणजे स्वतःलाच विवस्त्र दशेत पाहणे...
मनुष्य पैसे, नाती याबरोबरीने जपतो ते आपल्या इब्रतिला! लोक काय म्हणतील हा विचार आपल्या मनात इतका खोलवर रुतलेला असतो, की त्यामुळे विचार करण्याची पराकाष्टा होते. समाजात वावरताना आपण सभ्यपणे वावरतो. चारचौघात कोणी बोलले तर ओशाळतो. फजिती होईल या भीतीने पाऊल पुढे टाकायला घाबरतो. हे सगळे विचार मंथन डोक्यात सुरु असताना, मध्येच कधीतरी विचित्र स्वप्न पडते, दरदरून घाम फुटतो, जाग येते आणि ते स्वप्न होते या विचाराने आपण पाण्याचा घोट घेत शांत होतो. असेच एक घाबरवणारे स्वप्न म्हणजे विवस्त्र दशा! (Seeing yourself naked in dream)
आपण चारचौघात वावरतोय पण शरीरावर लज्जा रक्षणापुरताही कपडा नाही; आपण बाहेर निघालो आहोत पण कपडेच घालायला विसरलो, आपण अंघोळ करतोय तेवढ्यात कोणी आले आणि आपण उघडे पडलो आहोत अशी विवस्त्र दशेची स्वप्नं मनात दहशत निर्माण करतात. त्यामागे काय कारण असू शकते ते स्वप्नशास्त्र जाणणाऱ्या तज्ज्ञांकडून जाणून घेऊ.
स्वप्न शास्त्राचे जाणकार सांगतात, 'स्वप्न ज्योतिष शास्त्राच्या दृष्टीने सांगायचे, तर असे स्वप्न पाहणारे लोक येत्या काळात कंगाल होणार याची ही लक्षणे आहेत किंवा आर्थिक समस्या निर्माण होण्याचेही ते चिन्ह आहे असे समजावे. अशा वेळी स्वतःचा बँक बॅलेन्स स्वकष्टाणे वाढवण्यावर लक्ष द्यावे. नोकरी व्यवसायात अडचणी असतील तर जाणकार व्यक्तीचा सल्ला घेऊन आर्थिक प्रश्न मिटवण्यावर भर द्यावा. मन शांत स्थिर होईपर्यंत नवीन नोकरी, व्यवसायाचा निर्णय घेणे टाळावे.
मानसतज्ञ सांगतात -
असे स्वप्न पडण्याचे मुख्य कारण म्हणजे विचारांची, मनाची अस्थिरता. जर मन शांत नसेल, मनावर एखाद्या विषयाचे दडपण असेल तर चारचौघात अब्रू गेल्याही स्वप्ने दिसू लागतात. विवस्त्र स्थितीत आहोत असे जाणवते आणि स्वप्नात नाही तर सत्यात आपली फजिती होत आहे या विचाराने घाबरून जाग येते. अशा वेळी मन शांत करणे गरजेचे आहे. झोपण्याआधी दहा मिनिटे ओंकार जप करा. इष्ट देवतांचे स्मरण करा. एखादे स्तोत्र पाठ असेल तर ते म्हणा. गरम दूध प्या. असे केल्याने शांत झोप लागेल.
हेही असू शकते कारण -
मानसोपचार तज्ज्ञ सांगतात, 'जेव्हा तुम्हाला प्रत्यक्षात एखाद्या परिस्थितीची भीती वाटते, एखाद्या गोष्टीची काळजी लागून राहते, तेव्हा बऱ्याचदा अशी स्वप्न पडतात. मनावर असलेला ताण बेअब्रू होण्याची भीती निर्माण करतो. आपण खोटे पडू, उघड पडू, फजिती होईल, पुढे काय होणार याचा अतिविचार अशा स्वप्नाना कारणीभूत ठरतो.
त्यामुळे अशी स्वप्न दिसली म्हणून घाबरू नका, सावध व्हा, मन शांत ठेवण्याचा प्रयत्न करा, व्यायाम करा, मनावर आणि शरीरावर आलेले दडपण घालवा. वाईटात वाईट काय घडेल याची कल्पना करा आणि त्या स्थितीवर मात करण्यासाठी मनाला आधीच खंबीर बनवा. जेणेकरून स्वप्नातही अशी फजिती होण्याची काळजी लागून राहणार नाही आणि शांत झोप लागेल.