आपण कोणत्याही शुभ कार्याची सुरुवात गणेशाच्या पूजनाने करतो. त्यामुळेच तर कार्याचा श्रीगणेशा केला, असं म्हटलं जातं. त्याचप्रमाणे आरतीची सुरुवातही 'सुखकर्ता दु:खहर्ता' या आरतीनंच होते. आयुष्यात सुख आणणारा आणि दु:ख दूर करणारा असं यथार्थ वर्णन समर्थ रामदास स्वामींनी आरतीमधून केलेलं आहे. याशिवाय गणरायाच्या रुपाचं, त्याच्या गुणांचंही रामदास स्वामींनी अतिशय सुंदरपणे केलं आहे. रामदास स्वामींनी रचलेली मूळ आरती सात कडव्यांची आहे. पण बहुतेक ठिकाणी तीन कडव्यांचीच आरती म्हटली जाते. यंदा गणेशोत्सवात बाप्पासमोर पूर्ण आरती म्हणून बघा.. तुम्हाला नक्कीच एक वेगळी प्रसन्नता अनुभवता येईल.
सुखकर्ता दुःखहर्ता वार्ता विघ्नाची । नुरवी पुरवी प्रेम कृपा जयाची ॥
सर्वांगी सुंदर उटि शेंदुराची । कंठी झळके माळ मुक्ताफळांची ॥१॥
जय देव जय देव जय मंगलमूर्ती । दर्शनमात्रे मनकामना पुरती ॥ध्रु०॥
रत्नखचित फरा तुज गौरीकुमरा । चंदनाची उटी कुंकुमकेशरा ॥ हिरेजडीत मुकुट शोभतो बरा । रुणझुणती नूपरें चरणीं घागरिया ॥ जय० ॥२॥
माथा मुकुट मणी कानी कुंडले । सोंड दोंदावरी शेंदुर चर्चिले ।। नागबंद सोंड-दोंद मिराविले । विश्वरूप तया मोरयाचे देखिले ॥ जय० ॥३॥
चतुर्भुज गणराज बाही बाहुटे । खाजयाचे लाडू करुनी गोमटे ।। सुवर्णाचे ताटी शर्करा घृत । अर्पी तो गणराज विघ्ने वारीतो ॥ जय० ॥४॥
छत्रे चामरे तुजला मिरविती । उंदीराचे वाहन तुजला गणपती ।। ऐसा तु कलीयुगी सकळीक पाहसी । आनंदे भक्तासी प्रसन्न होसी ॥ जय० ॥५॥
ता ता धि मि किट धि मि किट नाचे गणपती । ईश्वर पार्वती कौतुक पाहती ।। ताल मृदंग वीणा घोर उमटती । त्यांचे छंदे करुनी नाचे गणपती ॥ जय० ॥६॥
लंबोदर पीतांबर फणिवरबंधना । सरळ सोंड वक्रतुंड त्रिनयना दास रामाचा वाट पाहे सदना । संकटीं पावावें निर्वाणीं रक्षावें सुरवर वंदना ॥ जय ० ॥ ७ ॥
जय देव जय देव जय मंगलमूर्ती । दर्शनमात्रे मनकामना पुरती ॥॥
!!गणपती बाप्पा मोरया!!