लहानपणी खेळण्याचे वय, तरुणपणी कमावण्याचे वय, म्हातारपणी राम राम करायचे वय, असा आपण समजच करून घेतलेला असतो. त्यामुळे होते काय, की ज्या वयात परमार्थ साधायला हवा, त्या वयात आपण तो करत नाही आणि जेव्हा तो करावा अशी इच्छा असते तेव्हा शरीर साथ देत नाही. याचा सुवर्णमध्य कसा काढावा? आयुष्यात परमार्थाचा समावेश कसा करावा? आयुष्याच्या कोणत्या टप्प्यावर करावा? हाच विषय घेऊन 'परमार्थ प्राप्तीचा मार्ग' या विषयावर मार्गदर्शन करणार आहेत, डॉ. पुरुषोत्तम राजीमवाले. आज दिनांक २७ फेब्रुवारी रात्री ८ वाजता लोकमत भक्ती युट्युब चॅनेलवर स्वप्नाली पाटील त्यांच्याशी संवाद साधणार आहेत.
डॉ. पुरुषोत्तम राजीमवाले हे शिवपुरी अक्कलकोटचे परम सद्गुरु श्री गजानन महाराज यांचे नातू आहेत. तसेच ते अक्कलकोट येथील श्री स्वामी समर्थ गुरूंच्या वंशातील आहेत. राजीमवाले कुटुंब मध्य भारतातील महाकोसल येथील राजेशाही कुटुंब म्हणून ओळखले जाते. १८०० सालापासून जनकल्याणासाठी झटण्याची परंपरा या कुटुंबाला लाभली आहे.
अक्कलकोट येथे अग्निहोत्राच्या प्राचीन सर्वोत्तम प्रथेचे डॉ. पुरुषोत्तम यांनी पुनरुज्जीवन केले आणि उपचार, शांतीचा संदेश जगाला देण्यासाठी शिवपुरीच्या आश्रमाची स्थापना केली. त्यांनी आपले संपूर्ण बालपण अक्कलकोटच्या मठात आध्यात्मिकदृष्ट्या भारावलेल्या वातावरणात, महान योगी व संतांसोबत व्यतीत केले आहे. तसेच त्यांचे वडील श्रीकांतजी महाराज यांच्या मार्गदर्शनाखाली त्यांनी गुरु परंपरेनुसार प्राचीन विद्या आत्मसात केली. डॉ. पुरुषोत्तम यांच्या वडिलांनी संस्कृतमध्ये पीएचडी करताना वैदिक साहित्यात विशेषज्ञता प्राप्त केली होती. वडिलांकडून वेदाभ्यासाचे धडे घेत त्यांनी आयुर्वेद, योग ते तत्वज्ञान आणि वैदिक विज्ञान इ. विषयांचाही अभ्यास केला. समग्र दृष्टिकोन ठेऊन, निसर्गाच्या सानिध्यात राहत आरोग्य व निरोगी आयुष्य कसे जगायचे, याची प्राचीन शिकवणी त्यांनी घेतली.
डॉ. राजीमवाले यांच्या ज्ञानाचा आवाका पाहता या चर्चासत्रातून आपल्यालाही ज्ञानात भर पडेल, हे निश्चित! तर ऐकायला विसरू नका... विषय : परमार्थ प्राप्तीचा मार्ग दि. २७ फेब्रुवारी २०२१, रात्री ८ वाजता