माजलगाव-पुणे ट्रॅव्हल्स पलटी होऊन एक ठार, आठ गंभीर

बीड : माजलगाववरून पुण्याला जाणारी ट्रॅव्हल्स पलटी होऊन एक ठार, तर आठ प्रवासी जखमी झाले. हा अपघात वडवणीजवळ सोमवारी मध्यरात्री ११.४५ वाजता झाला. शेषराव कुलकर्णी (रा. पुणे), असे मृताचे नाव आहे.माजलगाववरून ही ट्रॅव्हल्स रात्री ११ वाजता निघाली होती. वडवणीजवळ समोरील वाहनाला चकविताना ही ट्रॅव्हल्स पलटी झाल्याचा प्राथमिक अंदाज पोलिसांनी वर्तविला. या अपघातात एक ठार, तर आठ प्रवासी गंभीर जखमी झाले. इतर २५ प्रवासी किरकोळ जखमी झाल्याची प्राथमिक माहिती आहे. गंभीर जखमींवर जिल्हा रुग्णालयात, तर किरकोळ जखमींवर वडवणी आणि तेलगाव प्राथमिक केंद्रांत उपचार केले जात असल्याचे पोलिसांनी सांगितले.या अपघातात गणेश धर्मराज कदम (रा. निपाणी टाकळी), माऊली रामकिशन शिंदे (रा. पायतळवाडी), ज्ञानेश्वर कारभारी नरवटे, वैभव दगडू पांढरे (रा. पायतळवाडी), अविनाश कांबळे, सुभाष डाके, दत्ता लक्ष्मण जवदले (हिंगणवाडी), अजित बाबासाहेब सोनपसारे हे किरकोळ जखमी झाले असून इतरांची नावे समजू शकली नाहीत.