माजलगाव (बीड ) : सर्व प्रवासी बसमध्ये बसल्याने स्वतःची गाडी रिकामी राहिल्याने एका अवैध प्रवासी वाहतूक करणाऱ्याने रागाच्या भरात बस अडवून चालक आणि वाहकास मारहाण केल्याची घटना शनिवारी (दि. १८ ) सकाळी घडली. यानंतर मारहाण करणाऱ्यावर कारवाईची मागणी करत चालक वाहकांनी शिवाजी चौकात बस आडव्या लावत रास्तारोको आंदोलन केले.
माजलगाव बसस्थानाकातून सकाळी आठ वाजता आनंदगाव गाडी बाहेर पडत असताना रस्त्यात घायाळ नामक व्यक्तीने त्याची दुचाकी आडवी लावली होती. हॉर्न वाजवूनही तो गाडी बाजूला घेत नसल्याने वाहक सुमंत वाघ यांनी खाली उतरून दुचाकीस्वारास गाडी बाजूला घेण्याची विनंती केली. मात्र, घायाळ ने त्यांच्याशी हुज्जत घालत त्यांच्या श्रीमुखात भडकावली. हा प्रकार पाहताच चालक नवनाथ मुंडे हे तात्काळ खाली उतरले. घायाळ याने त्यांचे कपडे फाडून धक्काबुक्की केली.
घटनेची माहिती मिळताच आगारातील सर्व वाहक- चालकांनी एकत्र येत शिवाजी चौकात बस रस्त्यावर लावत रास्तारोको आंदोलन केले. हा प्रकार एक, दिड तासापासून सुरू असल्याने मोठ्याप्रमाणात वाहतूक खोळंबली असून, दुचाकीस्वारावर कारवाई, अटक केल्याशिवाय गाड्या काढणार नसल्याचा पवित्रा वाहक, चालकांनी घेतला आहे.