वडवणी : लिव्ह इनमध्ये राहणाऱ्या महिलेस जोडीदाराने डिझेल टाकून पेटविले. यात महिला गंभीररीत्या भाजली असून उपचार सुरू आहेत. ही घटना १५ सप्टेंबर रोजी येथे घडली. जोडीदारावर वडवणी ठाण्यात खुनाच्या प्रयत्नाचा गुन्हा नोंद असून, तो फरार आहे.
पोलिसांच्या माहितीनुसार, शहरातील एका २२ वर्षीय महिलेच्या पतीचे दोन वर्षांपूर्वी निधन झालेले आहे. सहा महिन्यांपासून ती बळिराम राजाभाऊ इचके (रा. उपळी ता. वडवणी) याच्याशी लिव्ह इनमध्ये असून, १५ सप्टेंबर रोजी घरातील स्टोव्हचे इंधन संपल्याने महिलेने स्वयंपाक केला नव्हता. डिझेल आणण्यावरून तिचे बळिरामशी कडाक्याचे भांडण झाले. डिझेल आणल्यावर रागाच्या भरात त्याने तिच्या अंगावर ते टाकून काडीपेटीने पेटवून दिले. यात ती ६३ टक्के भाजली असून, जिल्हा रुग्णालयात तिची मृत्यूशी झुंज सुरू आहे. तिच्या जबाबावरून पेठ बीड ठाण्यात खुनाच्या प्रयत्नाचा गुन्हा नोंद झाला. आरोपी फरार असून त्याचा शोध सुरू असल्याची माहिती सहायक निरीक्षक आनंद कांगुणे यांनी दिली.