लोकमत न्यूज नेटवर्कवडवणी : बीड - परळी हायवेवर कुप्पानजीक वळणावर शुक्रवारी दुपारी १२ च्या सुमारास लग्नासाठी दुचाकीवर निघालेल्या दाम्पत्याला भरधाव कारने धडक दिली. यामध्ये दुचाकीवरून एकजण जागीच ठार झाला तर महिला गंभीर जखमी झाली. तिला उपचारासाठी जिल्हा रूग्णालयात दाखल करण्यात आले आहे.
दत्ता बालासाहेब शिंदे (३५) व विद्या दत्ता शिंदे (रा. वडी, ता. पाथरी) हे वडवणी तालुक्यातील उपळी येथे लग्न समारंभाला दुचाकीवरून (एमएच २२ के ३१५४) जात होते. बीड - परळी हायवेवर कुप्पानजीक वळणावर समोरून भरधाव आलेल्या कार (एमएच ४८ एस २०३३) ने जबर धडक दिली.
यामध्ये दुचाकीवरील दत्ता शिंदे दुरवर फेकले गेले. त्यामुळे ते जागीच ठार झाले तर त्यांची पत्नी विद्या ही गंभीर जखमी झाली आहे. घटनेची माहिती मिळताच वडवणी ठाण्याचे संजय राठोड, बी.एन.शिंदे हे घटनास्थळी पोहचले. जखमीला उपचारासाठी बीड जिल्हा रुग्णालयात दाखल करण्यात आले आहे. घटना घडताच गाडीचालक फरार झाला असून, मयताला पोलिसांनी शवविच्छेदनासाठी कुप्पा प्राथमिक आरोग्य केंद्रात दाखल करण्यात आले होते.