अंबाजोगाई (बीड ) : सततच्या छेडछाडीला कंटाळुन व मानसिकरित्या त्रस्त झालेल्या दहावीच्या विद्यार्थिनीने रविवार रात्री राहत्या घरी गळफास घेऊन आत्महत्या केल्याची घटना अंबाजोगाई तालुक्यातील पट्टीवडगाव येथे उघडकीस आली. याप्रकरणी दोन तरुणांवर विनयभंग आणि पोक्सोसह आत्महत्येस प्रवृत्त केल्याचा गुन्हा नोंदवून त्यांना ताब्यात घेण्यात आले आहे.
वैष्णवी अशोक लव्हारे (वय १६, रा. पट्टीवडगाव, ता. अंबाजोगाई) असे आत्महत्या केलेल्या विद्यार्थिनीचे नाव आहे. नुकतीच तिने दहावीची परीक्षा दिली होती. तिच्या गावातील अमित साहेबराव माने (वय १९) याने रोहन गोविंद फड (वय १९) याच्या मदतीने संगनमताने वैष्णवी सोबत जवळीकता साधत तिच्या घराकडे सातत्याने दुचाकीवरून चकरा मारून पाठलाग केला आणि तिचा विनयभंग केला. या दोघा तरुणांनी वैष्णवी आणि तिच्या वडिलांना धमक्या देत मानसिक त्रास देखील दिला. अखेर या त्रासाला कंटाळून वैष्णवीने रविवारी रात्री ९.३० वाजताच्या सुमारास घरात गळफास घेतला. ही घटना लक्षात येताच वैष्णवीच्या कुटुंबीयांनी तिला तातडीने खाली उतरवून स्वाराती रुग्णालयात दाखल केले. मात्र, तिथे डॉक्टरांनी तिला तपासून मयत घोषित केले असे वैष्णवीचे वडील अशोक अंबाजी लव्हारे यांनी फिर्यादीत नमूद केले आहे.
अशोक लव्हारे यांच्या तक्रारीवरून बर्दापूर पोलीस ठाण्यात अमित माने आणि रोहन फड या दोघांवर विनयभंग आणि पोक्सोसह आत्महत्येस प्रवृत्त केल्याचा गुन्हा नोंदविण्यात आला आहे. पुढील तपास सहा. पोलिस निरिक्षक लक्ष्मण केंद्रे यांच्या मार्गदर्शनाखाली जमादार बाळासाहेब मुळे हे करत असून दोन्ही आरोपींना ताब्यात घेण्यात आले आहे.