लेखी आश्वासनानंतर वंचितचे आंदोलन मागे

गेवराईचे तहसीलदार तथा दंडाधिकाऱ्यांनी २८ मे रोजी लेखी पत्राद्वारे मौजे सुरळेगाव, पंचाळेश्वर, राक्षसभुवन शनिचे, नागझरी वाळूघाटातून अनधिकृत वाळूचे उत्खनन व वाहतूक होऊ नये याची खबरदारी घेण्यात आल्याचे स्पष्ट केले. तर जिल्हाधिकाऱ्यांच्या आदेशातील नमूद अटी-शर्तींचे काटेकोर पालन करण्याबात संबंधित लिलावधारकास सूचना देण्यात आल्या आहेत. लिलावधारकांकडून अटी व शर्तींच्या पालनाची तपासणी करण्यासाठी नायब तहसीलदारांच्या नियंत्रणाखाली मंडळ अधिकारी व तलाठी यांचे विशेष पथक स्थापन करण्यात आले. उत्खननाचे मोजमाप करण्यासाठी ईटीएस मशीनद्वारे मोजणी करण्याबाबत सूचना दिल्या आहेत. वाळूघाटाची ईटीएस मशीनद्वारे मोजणी करून टेंडरधारकांना ठरवून दिलेल्या परिणामापेक्षा (ब्रास व क्षेत्र) जास्तीचे उत्खनन केले असल्यास नियमानुसार कारवाई करण्यात येणार असल्याचे प्रशासनाने स्पष्ट केले. त्यामुळे आंदोलन तूर्त स्थगित केल्याचे तालुकाध्यक्ष पप्पू गायकवाड, किशोर भोले, ज्ञानेश्वर हवाले, शरद खापरे यांनी सांगितले.