कडा ( बीड ) : बारामतीवरून शेवगाव येथील नातेवाईकाच्या अंत्यविधीसाठी जात असताना पैठण-बारामती रोडवर आज दुपारी कार आणि जीपची समोरासमोर धडक झाली. यात कारमधील एक जण जागीच ठार झाला तर अन्य सहा जण जखमी झाले. मुनीरभाई हाजीर आतार ( ७० ) असे मृताचे नाव असून हा अपघात आष्टी तालुक्यातील देविनिमगांव येथे झाला.
बारामती येथील रहवाशी असलेले आतार कुटुंबातील सदस्यासह शेवगांव येथील पाहुण्याच्या अंत्यविधीसाठी कारमध्ये (क्रमांक एम.एच. १४, बी.सी.८१५७ ) जात होते. दुपारी अडीजवाजेच्या सुमारास पैठण-बारामती रोडवरील देवीनिमगाव येथील वळणावर कार आणि धामणगांववरून कड्याकडे येत असलेली जीपची ( क्रमांक एम.एच. ४२ ए.एस. ४७५५ ) समोरासमोर धडक झाली.
अपघातात कारमधील मुनीरभाई आतार यांचा जागीच मृत्यू झाला. तर कारमधील मुलगा, सुन, भाची, नातू आणि जीपचा चालक व अन्य एक असे सहा जण जखमी झाले. त्यांच्यावर कडा येथील खाजगी रुग्णालयात उपचार सुरू आहेत.