अंबाजोगाई - देशभर सध्या आयपीएलचे वारे वाहत आहेत, त्यासोबतच सट्टेबाजीलाही ऊत आल्याचे दिसून येत आहे. अंबाजोगाईत मंगळवारी (दि.२९) शहर पोलिसांनी बलुत्याचा मळा भागात सुरु असलेल्या सट्टेबाजीच्या अड्ड्यावर छापा मारून चार सट्टेबाजांना ताब्यात घेत त्यांच्याकडून १९ हजारांचा मुद्देमाल जप्त केला.
बलुत्याचा मळ्यात आयपीएल सामन्यांवर सट्टा सुरु असल्याची माहिती शहर पोलिसांना मिळाली होती. त्याआधारे पोलिसांनी मंगळवारी रात्री सव्वा दहाच्या सुमारास सदरील ठिकाणी छाप मारला. यावेळी सतीश नागनाथ गंजेवार, दत्ता गोविंदराव साखरे, अनंत जगन्नाथ कदम (सर्व रा. अंबाजोगाई) आणि बालाजी पाटील (रा. लातूर) हे चौघे राजस्थान रॉयल्स विरुद्ध सनरायजर्स हैद्राबाद या सामन्यावर मोबाईलवरून सट्टा खेळताना आणि खेळवत असताना आढळून आले.
पोलिसांनी त्यांना ताब्यात घेत त्यांच्याकडून १९ हजारांचा मुद्देमाल जप्त केला. पो.ना. गोविंद येलमाटे यांचं फिर्यादीवरून चौघांवर शहर ठाण्यात गुन्हा नोंद करण्यात आला. ही कारवाई पोलीस निरिक्षक बाळासाहेब पवार यांच्या मार्गदर्शनाखाली पीएसआय गोपाळ सूर्यवंशी, पोलीस कर्मचारी गोविंद येलमाटे, नागरगोजे, शेख यांनी पार पाडली.