लोकमत न्यूज नेटवर्क
शिरूर कासार : संस्कृतीला काळिमा फासणारी घटना तालुक्यातील घाटशीळ पारगांव येथे पितृ दिनाच्या पूर्वसंध्येला घडली. विकृत मुलाने आपल्या जन्मदात्या आई-वडिलांनाच काठीने अमानुष मारहाण करीत त्यांच्यावर प्राणघातक हल्ला केला. या मारहाणीत त्याच्या आईचा मृत्यू झाला आहे. तर, वडील अत्यवस्थ अवस्थेत अहमदनगर येथील खाजगी रुग्णालयात उपचार घेत आहेत. ही घटना शनिवारी सायंकाळी साडेचार वाजण्याच्या सुमारास घडली.
घटनेचा फारसा बोलबाला झाला नाही मात्र, सदरील घटनेचा रविवारी सकाळी व्हिडिओ सोशल मीडियावर व्हायरल झाल्याने एकच खळबळ उडाली आहे. याबाबत अधिकची माहिती अशी, त्र्यंबक विश्वनाथ खेडकर (वय ७५) व त्यांची पत्नी शाहूबाई त्र्यंबक खेडकर (वय ७०) हे आपल्या मुलासह शेतात घरी राहत होते. त्यांना बाबासाहेब (दादासाहेब) त्र्यंबक खेडकर या त्यांच्या ४५ वर्षीय मुलाने शनिवारी साडेचारच्या सुमारास काठीने अमानुष मारहाण केली. वयस्कर आई-वडिलांना काठीने जबर मारहाण करताना त्यांच्या केविलवाण्या किंकाळ्या सुध्दा या विकृत मुलाला पाझर फोडू शकल्या नाहीत. काठीचा वर्मी घाव बसल्याने आईचा मृत्यू झाला तर वडिलांना अहमदनगर येथे उपचारासाठी रुग्णालयात दाखल केल्याची माहिती स्थानिकांनी दिली.
....
मायेपोटी आले होते भेटायला
सततच्या त्रासामुळे त्याचे आई, वडील देखील मुलीकडे असतात. मात्र, मुलाला काही दिवसांपूर्वी कोरोना झाला होता म्हणून दोघेही त्याला मायेपोटी भेटण्यास आले होते. या दोघांनाही मारहाण झाल्यानंतर ग्रामस्थांनी उपचारासाठी अहमदनगरला नेले. मात्र, उपचारादरम्यान आईचा मृत्यू झाला. तर, वडील अत्यवस्थ अवस्थेत उपचार घेत असल्याची माहिती पोलिसांकडून सांगण्यात आली.
...
मयत झालेल्या शाहूबाई खेडकर या सत्तर वर्षीय आईची उत्तरीय तपासणी नगर येथे सुरू असल्याचे पोलिसांकडून सांगण्यात आले. पोलिसांना माहिती मिळाल्यावरून सहायक पोलीस निरीक्षक डॉ. रामचंद्र पवार यांनी घटनास्थळी भेट दिली. घटनेचा पंचनामा करून आईचा खून करणाऱ्या मुलाला बेड्या ठोकल्या आहेत. याप्रकरणी गुन्हा दाखल करण्याची प्रक्रिया रात्री उशिरापर्यंत सुरु होती.
...
विकृत स्वभावामुळे पत्नी, मुले दुरावली
आईची हत्या करणारा आबासाहेब उर्फ दादासाहेब खेडकर याच्या विकृत स्वभावामुळे त्यांची पत्नी व मुले देखील जवळ राहत नाहीत. त्याची पत्नी मुलाला घेऊन माहेरी राहत आहेत. तर, त्याच्या या वागण्यामुळे आई, वडील देखील बहिणीकडे राहत होते. दरम्यान आरोपीला काही दिवसांपूर्वी कोरोना झाल्यामुळे आई-वडील भेटण्यासाठी आले होते, अशी माहिती ग्रामस्थांनी दिली.
....