अंबाजोगाई (बीड) : अंबाजोगाई शहरापासून दहा किलोमीटर अंतरावर असलेल्या येल्डा ते मुकुंदराज घाटामध्ये ऊसतोड कामगारांना घेऊन जाणारे ट्रॅक्टर उलटल्याने झालेल्या अपघातात ११ वर्षीय मुलाचा जागीच मृत्यू झाला. तर १२ जण जखमी झाले आहेत. यापैकी दोघे गंभीर जखमी झाले असून सर्व जखमींवर अंबाजोगाईच्या स्वाराती रुग्णालयात उपचार सुरू आहेत. हा अपघात आज सकाळी ६ वाजेच्या सुमारास झाला.
रणजित अमोल कांबळे (वय-11) असे त्या मृत मुलाचे नाव आहे. आज पहाटे येल्डा (ता. अंबाजोगाई) येथील ऊसतोड मजूर ट्रॅक्टरमधून साखर कारखान्याकडे उसतोडीसाठी जात असताना सकाळी ६ वाजेच्या सुमारास ट्रॅक्टरचा रॉड तुटल्याने ट्रॉली मुकुंदराज घाटाच्या अलीकडे उलटली. यात एका मुलाचा जागीच मृत्यू झाला असून दोघांची प्रकृती गंभीर आहे. तर इतर 8 ते 10 जण जखमी झाले आहेत. या सर्व जखमींना उपचारासाठी स्वाराती रुग्णालयात दाखल केले आहे.
माहिती मिळताच सामाजिक कार्यकर्ते नंदकिशोर मुंदडा, नायब तहसिलदार मिलिंद गायकवाड, वरिष्ठ लिपिक नाना गायकवाड, सचिन अंजान, वरिष्ठ लिपीक शेख अन्वर, सारंग पुजारी यांनी घटनास्थळी धाव घेत जखमींना तात्काळ मदत केली. सर्व जखमींना तातडीने स्वामी रामानंद तिर्थ रुग्णालयात दाखल करण्यात आले. दरम्यान, घटनास्थळी अप्पर जिल्हाधिकारी मंजुषा मिसकर,तहसीलदार विपीन पाटील यांनी भेट देऊन पाहणी केली.