अमरावती : कठोर संचारबंदीचे निर्बंध शिथिल केल्यानंतर कोरोना प्रतिबंधक नियमांचे काटेकोर पालन प्रत्येकाला अनिवार्य आहे. मात्र, काही नागरिकांकडून शिस्तीचे पालन होत नसल्याने प्रशासनाने आता कारवाईचा पावित्रा घेतला आहे. गुरुवारपासून तीन दिवस शहरातील चौकाचौकांत २० पथकांचा ‘वॉच‘ राहणार आहे. चार उपजिल्हाधिकाऱ्यांच्या नेतृत्वात ही पथके दंडात्मक कारवाया करतील, तसे आदेश जिल्हाधिकारी शैलेश नवाल यांनी बुधवारी जारी केले आहेत.
या पथकात शासनाच्या विविध विभागांचे अधिकारी व कर्मचारी आहेत. प्रत्येक पथकात चार कर्मचारी आहेत. यात महापालिका व पोलीस विभागाचा प्रत्येकी एक कर्मचारी प्रत्येक पथकात राहणार आहे. या पथकांना शहरातील परिसर विभागून देण्यात आलेला आहे. नागरिक, आस्थापना तसेच प्रतिष्ठानाद्वारा कोरोना प्रतिबंधात्मक नियमांचे उल्लंघन झाल्यास या पथकांद्वारे दंडनीय कारवाई केली जाणार आहे.
पहिले पथक उपजिल्हाधिकारी (महसूल) रणजित भोसले यांचे आहे. यामध्ये राज्य कर निरीक्षक सागर राजूरकर यांचे पथकाला कोर्ट परिसर, सिंचन विभागाचे उपकार्यकारी अभियंता अनिल मोहाळे यांना गाडगे बाबा मंदीर परिसर, सहा कामगार आयुक्त, अनिल कुटे यांना भाजीबाजार परिसर, जिल्हा उपनिबंधक संदीप जाधव यांना मोची गल्ली, समाजकल्याणच्या सहायक आयुक्त मंगला मून यांच्याकडे कॉटन मार्केट परिसर राहणार आहे.
उपजिल्हाधिकारी वर्षा पवार यांच्या नेतृत्वातील पथकात कौशल्य विकासचे सहायक संचालक प्रफुल्ल शेळखे यांना दस्तूरनगर, एमआयडीसीचे प्रादेशिक अधिकारी गुडधे यांच्याकडे रुख्मिनीनगर, जलसंधारण अधिकारी निपाणे यांच्याकडे इतवारा बाजार, उद्योग निरीक्षक सांगळे यांना जवाहर गेट ते सराफा, जीएसडीएचे संजय कराड यांच्याकडे गुलशन मार्केट हा परिसर राहणार आहे.
बॉक्स
जवाहर रोड, गांधीचौक, मालटेकडी व नवाथे
उपजिल्हाधिकारी राम लंके यांच्या नेतृत्वातील पथकात नगररचनाचे सहा. संचालक वाघाडे यांच्याकडे जवाहर रोड, नियोजन अधिकारी वर्षा भाकरे यांना रविनगर, उद्योग निरीक्षक एन.एन. इंगळे यांना रविनगर, सहायक नगर रचनाकार श्रीकांत पेठकर यांना मालटेकडी परिसर, उपविभागीय अभियंता द. श. दारोडे यांच्या पथकाचा नवाथे चौक परिसरात वॉच राहणार आहे.
बॉक्स
जयस्तंभ, राजकमल, इर्विन, पंचवटी
एसडीओ उदयसिंह राजपूत यांच्या नेतृत्वातील पथकात उपकार्यकारी अभियंता एन.एस सावरकर यांना जयस्तंभ चौक, राज्य कर निरीक्षक सागर मोटघरे यांना राजकमल चौक, विक्रीकर निरिक्षक शैलेश पिल्ले यांना इर्विन चौक, विक्रीकर निरीक्षक राजेश राऊत यांना मालटेकडी परिसर व विक्रीकर निरीक्षक मंगेश भोनखाडे यांच्या पथकाचा पंचवटी चौक परिसरात वॉच राहील.
बॉक्स
मास्क नसल्यास ७५० रुपये दंड
आता चेहऱ्यावर मास्क नसल्यास ७५० रुपये दंडाची आकारणी होणार आहे. आस्थापना, प्रतिष्ठाने, दुकाने यामध्ये दोन ग्राहकांत किमान तीन फुटांचे अंतर नसल्यास दुकानदार किंवा चालकास ३५ हजारांचा दंड आकारला जाईल. याशिवाय दुसऱ्यांदा नियमांचे उल्लंघन करताना आढळल्यास एफआयआर नोंदविला जाणार आहे.