धामणगावातील अडीच हजार घरांना एकाच दिवशी भेटी

प्रशासनाची वारी घरकुल लाभार्थींच्या दारी : अधिकाऱ्यांनी जाणल्या समस्या

धामणगाव रेल्वे : तालुक्यातील २ हजार ५०० घरकुलांचे काम मार्च महिना संपण्यापूर्वी सुरू व्हावे, यासाठी ६२ ग्रामपंचायतींमध्ये ‘प्रशासनाची वारी घरकुल लाभार्थींच्या दारी’ हा उपक्रम राबविण्यात आला.

धामणगाव तालुक्यात ४ हजार १०७ घरकुलांना मंजुरी मिळाली होती. यातील काही घरकुलांची कामे पूर्ण झाली. मात्र, अंजनसिंगी, जुना धामणगाव, वरूड बगाजी, मंगरूळ दस्तगीर, देवगाव, निंबोली, तळेगाव दशासर, शेंदूरजना खुर्द या पंचायत समिती सर्कलमधील अडीच हजार घरकुले रखडली होती. जिल्हा प्रशासनाच्या आदेशानंतर पंचायत समितीच्या गटविकास अधिकारी माया वानखडे यांनी आठही सर्कलमध्ये नोडल अधिकाऱ्यांची नियुक्ती केली होती. सोमवारी ६२ नोडल अधिकाऱ्यांनी घरकुलापासून वंचित लाभार्थींच्या घरी भेटी दिल्या. गटविकास अधिकारी वानखडे यांनी स्वत: १२ गावांचा दौरा करून घरकुलधारकांच्या समस्या ऐकून घेतल्या. तीन दिवसांत युद्धस्तरावर जागेचा प्रश्न निकाली लावून घरकुलाचा पहिला हप्ता मार्च महिना संपण्यापूर्वी लाभार्थींच्या खात्यात जमा होणार असल्याची माहिती गटविकास अधिकारी वानखडे यांनी दिली.