अमरावती : गाडगेनगर हद्दीत एमडीची खुलेआम विक्री करणाऱ्या दोन ड्रग्स पेडलरला अटक करण्यात पोलिस आयुक्तांच्या ‘सीआययू’ विशेष पथकाला यश मिळाले. एमडी ड्रग्ज विक्रीसाठी जात असलेल्या दोघांना सीआययू पथकाने १९ जून रोजी रात्री वलगाव मार्गावरून अटक केली. त्यांच्याकडून ३१.५८० ग्रॅम एमडी ड्रग्जसह दोन दुचाकी, मोबाइल व रोख असा ४ लाख २६ हजार २६० रुपयांचा मुद्देमाल जप्त करण्यात आला. शेख अयान शेख रमजान (१९) रा. हबीबनगर, अमरावती व सय्यद आफाक सय्यद निझाम (२०) रा. ताजनगर क्र. १, अमरावती अशी अटक आरोपींची नावे आहेत.
एफआयआरनुसार, शेख अयान व सय्यद आफाक हे दोघे एमडी ड्रग्जचे पाऊच बाळगून विक्री करण्याकरिता दुचाकीने वलगाव मार्गावरील धर्मकाट्याकडून नागपुरी गेटकडे येणार असल्याची माहिती गस्तीवर असलेल्या सीआययू पथकाला मिळाली. त्या आधारे पथकाने वलगाव मार्गावर सापळा रचून शेख अयान व सय्यद आफाक यांना ताब्यात घेतले. अंगझडती तसेच दोन्ही दुचाकींच्या डिक्कीची पाहणी केल्यावर त्यांच्याजवळ २ लाख २२ हजार रुपये किमतीची ३१.५८० ग्रॅम एमडी ड्रग्ज आढळून आली. त्यानुसार पथकाने या दोघांना अटक करून त्यांच्याकडून एमडी ड्रग्ज, दोन दुचाकी, दोन मोबाइल व १४ हजार २६० रुपये रोख असा एकूण ४ २६ हजार २६० रुपयांचा मुद्देमाल जप्त केला. त्यांच्याविरुद्ध गाडगेनगर पोलिस ठाण्यात गुन्हा दाखल करण्यात आला. ही कारवाई सीआययू युनिटचे प्रमुख तथा सहायक पोलिस निरीक्षक महेंद्र इंगळे, अंमलदार सुनील लासूरकर, सुधीर गुडधे, जहीर शेख, अतुल संभे, राहुल ढेंगेकर, विनोद काटकर यांनी केली.