अमरावती: दारूच्या आहारी गेलेल्या बापाला पोटच्या तरूण मुलाने जीवाने संपविले. त्याने त्यात चुलतभावाला देखील सहभागी करून घेतले. २० मे रोजी सकाळी तरोडा जगताप शिवारात ही घटना उघड झाली. सतीश गंगाधर कुरटकार (४२,रा. जळगाव आर्वी, ता. धामणगाव रेल्वे) असे मृताचे नाव आहे. काही तासातच मृताची ओळख पटल्यानंतर त्याचा खून झाल्याचा उलगडा देखील झाला. ओळख पटण्यापुर्वी काही वेळाकरीता हत्या की आत्महत्या असा संभ्रम निर्माण झाला होता.
याप्रकरणी, कुऱ्हा पोलिसांनी एका महिलेच्या तक्रारीवरून मृताचा मुलगा अभी सतीश कुरटकर (१९, रा. जळगाव आर्वी) व पुतण्या यश जगदिश कुरटकार (१९, रा. खडकसावंगा, बाभुळगाव) यांच्याविरूध्द कलम ३०२ अन्वये गुन्हा दाखल करून दोघांनाही तातडीने अटक केली. अवघ्या काही तासात मृताची ओळख पटवून कुऱ्हा पोलिसांनी दोन्ही आरोपींना हुडकून काढले. सतीश कुरटकर हा दारूच्या आहारी गेला होता. तो दारू पिऊन नेहमीच कुटुंबियांसह अन्य जणांशी देखील वाद करायचा. त्यामुळे जगणे मुश्किल झाले होते, त्या कारणावरुन खून केल्याची कबुली दोन्ही आरोपींनी दिली आहे. २० मे रोजी सकाळी ९.३० च्या सुमारास उघड झालेल्या या घटनेप्रकरणी शनिवारी सायंकाळी ७.३४ च्या सुमारास गुन्हा नोंदविण्यात आला.शिवारात आढळला मृतदेह
तरोडा जगताप शिवारातील प्रभाकर जगताप यांच्या शेतात अनोळखी मृतदेह आढळल्याची माहिती कुऱ्हा पोलिसांनी पोलीस पाटलांकरवी देण्यात आली. त्यामाहितीनुसार, कुऱ्हाचे ठाणेदार गीता तांगडे यांनी तातडीने घटनास्थळ गाठले. घटनास्थळी एका तरूण व्यक्तीचा मृतदेह असून, त्याच्या पोटावर, कमरेच्यावर व पायावर धारदार शस्त्राचे वार दिसून आले. पंचनामा करत पोलिसांनी मूतदेहाची ओळख पटविण्यासाठी पोलीस पाटलासह अन्य लोकांची मदत घेतली. तर मृताचा फोटो सोशल व्हायरल करण्यात आला. त्यामुळे लगेचच मृताची ओळख पटली. दोन्ही आरोपी सतीशला शिवारात घेऊन गेले होते.आरोपींच्या बयाणानुसार, मृतक हा दारूच्या आहारी गेला होता. मुलगा व पुतण्या त्याला शेतात घेऊन गेले. तेथे तिघांमध्ये कडाक्याचा वाद झाला. त्यातून सतीश कुरटकर याच्यावर धारदार शस्त्राने वार करण्यात आले. आरोपींना अटक केली.गीता तांगडे, ठाणेदार, कुऱ्हा