अमरावती : इन्स्टावर व्हिडिओ टाकतेस, साऱ्या जगाला दाखविते, मला पण दाखव, अशी गर्भित धमकी देत एका महिलेचा विनयभंग करण्यात आला. याप्रकरणी राजापेठ पोलिसांनी आरोपीऋषभ जाधव (रा. अमरावती) याच्याविरूध्द २५ ऑगस्ट रोजी सायंकाळी विनयभंगाचा गुन्हा दाखल केला.
तक्रारीनुसार, आरोपी ऋषभ जाधव याने २५ ऑगस्ट रोजी दुपारी दोनच्या सुमारास त्या महिलेला फोन कॉल केला. तिने तो कॉल रिसिव्ह केला असता, आरोपीने तिला अश्लाघ्य भाषेत शिविगाळ केली. मारण्याची धमकी देखील दिली. आरोपी एवढ्यावरच थांबला नाही, तर त्याने तिला ती इन्स्टावर टाकत असलेल्या व्हिडीओबाबत देखील हटकले. साऱ्या जगाला स्वत:ला दाखवतेस, मला पण दाखव, असे म्हणत त्याने तिला चक्क बलात्काराची धमकी दिली. त्यामुळे ती नखशिखांत हादरली. तिने ती बाब कुटुंबुयांच्या कानावर घालत दुपारीच राजापेठ पोलीस ठाणे गाठले.
रस्त्यात अडवून म्हणाला, रिलेशनशिपमध्ये राहा
विनयभंगाची अन्य एक घटना फ्रेजरपुरा पोलीस ठाण्याच्या हद्दीत २५ ऑगस्ट रोजी सायंकाळी ५.३० च्या सुमारास घडली. आरोपी राहुल रामटेके याने एका अल्पवयीन मुलीला पाठलाग करत थांबविले. तू माझ्याशी का बोलत नाहीस, रिलेशनशिपमध्ये तसेच जवळ का राहत नाहीस, असे म्हणून शिविगाळ केली. तथा मारण्याची धमकी दिली. त्यामुळे पिडिता ही घाबरलेल्या अवस्थेत घरी आली. घडलेली घटना कुटुंबियांना सांगितल्यानंतर तिने रात्री फ्रेजरपुरा पोलीस ठाणे गाठले.