---------
फारकतीसाठी पत्नीला काठीने मारहाण
अमरावती : फारकतीसाठी मद्यपी पतीने पत्नीला काठीने मारहाण केली. ही घटना फ्रेजरपुरा पोलीस ठाण्याच्या हद्दीतील वडाळी येथे ११ एप्रिल रोजी घडली. पीडित महिलेला मुलगा होत नसल्याने पती सुमित भोसले (४०) याने त्यांना दुसरे लग्न करण्यासाठी फारकती मागितली. मात्र, महिलेने फारकती देण्यास नकार दिला. त्यामुळे सुमितने पत्नीला काठीने मारहाण करून जखमी केले. याप्रकरणी महिलेने फ्रेजरपुरा पोलीस ठाण्यात तक्रार दाखल केली.
--------
तरुणीचा विनयभंग करून धमकी
अमरावती : एका तरुणीचा विनयभंग करून धमकी देण्यात आली. ही घटना फ्रेजरपुरा पोलीस ठाण्याच्या हद्दीत १२ एप्रिल रोजी उघडकीस आली. पीडित तरुणी लहान भावाचा वाढदिवस असल्याने दुचाकीने केक आणायला जात होती. मार्गात अभिजित मोहन पानेकर (२१) याने दुचाकी आडवी करून तिला अडविले. तिच्या दुचाकीची चावी काढून माझ्या संग चल, असा आग्रह धरला. अन्यथा तुझी बदनामी करेल, अशी धमकीही त्याने दिली. त्याचवेळी एका नागरिकाने त्याला हटकले. त्यामुळे अभिजित तेथून निघून गेला. सदर घटनेनंतर पीडितेने फ्रेजरपुरा पोलीस ठाण्यात तक्रार दाखल केली.
----------------
गंगोत्रीनगरात घर फोडले
अमरावती : गाडगेनगर पोलीस ठाण्याच्या हद्दीतील गंगोत्रीनगर येथील रहिवासी नागरिकाचे घर फोडून अज्ञात चोरट्यांनी ३५ हजारांचा मुद्देमाल लांबविला. ही घटना १२ एप्रिल रोजी उघडकीस आली. गंगोत्रीनगर येथील रहिवासी सुरेशसिंह मनजितसिंह बग्गा (४४) यांचे घर फोडून चोरट्यांनी ३५ हजारांचा मुद्देमाल लांबविला. ही बाब लक्षात आल्यावर सुरेशसिंह बग्गा यांनी गाडगेनगर पोलीस ठाण्यात तक्रार दाखल केली.
-------------
अल्पवयीन तरुणीला पळविले
अमरावती : एका अल्पवयीन तरुणीला पळविले. ही घटना राजापेठ पोलीस ठाण्याच्या हद्दीत १२ एप्रिल रोजी उघडकीस आली. राजापेठ पोलीस ठाण्याच्या हद्दीत राहणारा १९ वर्षीय तरुण कामावरून घरी परतल्यावर त्याला लहान बहीण घरी दिसून आली नाही. त्याने तिचा सर्वत्र शोध घेतला. मात्र, तिचा पत्ता लागला नाही. तिला कुणीतरी अज्ञाताने पळविल्याचा संशय आल्याने भावाने राजापेठ पोलीस ठाण्यात तक्रार दाखल केली.
--------------
महिलेचा विनयभंग करून शिवीगाळ
अमरावती : एका महिलेचा विनयभंग करून शिवीगाळ करण्यात आली. ही घटना राजापेठ पोलीस ठाण्याच्या हद्दीत १२ एप्रिल रोेजी घडली. पीडित महिला घरी एकटीच होती. यावेळी सचिन मदनलाल श्रीवास (४२) रा. मोतीनगर हा त्यांच्याकडे आला. मला लोनसंदर्भात बँकेत चेक टाकायचा आहे, असे म्हणून त्याने महिलेकडे चेक मागितले. महिलेने नकार दिल्यावर सचिनने त्यांचा विनयभंग करून चेक हिसकावून घेतला. महिलेने आरडाओरड केल्यावर सचिनने त्यांना शिवीगाळ केली. त्यानंतर तो तेथून निघून गेला. याप्रकरणी पीडितेने राजापेठ ठाण्यात तक्रार दाखल केली.
---------------
तरुणाची गळफास घेऊन आत्महत्या
अमरावती : एका तरुणाने राहत्या घरी गळफास घेऊन आत्महत्या केली. ही घटना खोलापुरी गेट पोलीस ठाण्याच्या हद्दीतील गांधी आश्रम येथे १२ एप्रिल रोजी उघडकीस आली. प्रणय सुनील जाधव (१८) रा. गांधी आश्रम असे मृताचे नाव आहे. प्रणयने राहत्या घरी गळफास घेतला. ही बाब त्याच्या काकाच्या लक्षात आल्यावर खोलापुरी गेट पोलिसांना माहिती देण्यात आली. पोलिसांनी घटनास्थळ गाठून पंचनामा केला व मृतदेह शवविच्छेदनासाठी जिल्हा सामान्य रुग्णालयात पाठविले. प्रणयच्या आत्महत्येचे कारण कळू शकले नसून याप्रकरणी पोलिसांनी आकस्मिक मृत्यूची नोंद केली.