बडनेरा : नजीकच्या ग्राम मोगरा येथे सरपंचपदाच्या निवडणुकीदरम्यान झालेल्या दोन गटांतील हाणामारीत तिघे गंभीर जखमी झाल्याची घटना १६ फेब्रुवारी रोजी घडली. याप्रकरणी परस्परविरोधी तक्रारींवरून गुन्हे दाखल करण्यात आले.
मोगरा येथे मंगळवारी सरपंच-उपसरपंचपदासाठी निवडणूक ठरली होती. तेथील ग्रामपंचायत कार्यालयात दोन गटांतील सदस्य अर्ज घेण्यासाठी सकाळी साडेदहाला गेले असता, त्यांच्यात वाद झाला. दोन्ही गटांतील मंडळींनी जमाव करून दगडफेक व धारदार शस्त्राने हाणामारी केली. यात तिघे गंभीर जखमी झाले. जखमींमध्ये एका महिलेचा समावेश आहे.
बडनेरा पोलीस ठाण्यात एका बाजूने श्रीकृष्ण तुकाराम जाधव, तर दुसऱ्या बाजूने मनोज मुन्नासिंह जाधव यांनी फिर्याद दाखल केली. पोलिसांनी श्रीकृष्ण जाधव, पंडित आडे, दिवाकर जाधव, मोहन जाधव, सुनील राठोड, हिरालाल जाधव, गजानन जाधव, अजय जाधव, विष्णू जाधव, बाळू पवारसह दोन्ही गटांतील ३७ जणांविरुद्ध भादंविचे कलम ३०७ तसेच दंगा प्रतिबंधक कलम १३५, १८८ अन्वये गुन्हे दाखल केले. दोन्ही गटांतील १४ जणांना अटक करण्यात आली. पोलीस उपायुक्त शशिकांत सातव, पोलीस निरीक्षक पंजाब वंजारी, बबन पुसाटे, पोलीस निरीक्षक उमेश मारोडकर यांच्यासह मोठा ताफा घटनास्थळी दाखल झाला.